Олн зүсн өңгтә цецгүд хорасиг кеерүлнә

Одахн Ик Буурла района Көвүд селәнә дунд сурһульд тусад, тенд олн зүсн цецгүд урһҗахиг үзәд бахтв. Хойр давхр дунд сурһулин герт орҗ ирсн күн болһн энд олн зүсн цецгүд хорасиг кеерүлҗәхиг үзҗ өврнә. Дунд сурһулин һардач Бамбша Эрднин келсәр, багшнр, көдләчнр болн сурһульчнр цугтан тедниг суулһҗ, арднь орҗ хәләҗ тәвцән орулхар шунна.
Олн җилдән энд көдлҗәдг Музран Наталья болн Довукан Лариса сурһулин бүрдәцд цевр-цер бәәдл тетксн деерән цугинь ахулҗ кеерүлхәр шунна. Күүкд улс олн зүсн цецгүд суулһҗ, тедниг услҗ, немр ясвр орулҗ, шарлсн хамтхасдынь хураҗ асрна. Багшнр болн сурһульчнр гертәсн бас цецгүд авч ирҗ, төрскн сурһулян сәәхрүлнә.
- Бидн цецгүдт кергтә ааһ-сав, шавр хулдҗ авад, хур орхла ус цуглулҗ авад терүгәр услнавидн. Олн зүсн цецгүд урһҗахнь сән кец-таал тогтасн деерән аһар цеврлнә. Дәкәд цецгүдин хамтхасдыг адһм угаһар арчад, шарлсн тоотынь уга кеһәд, һазринь малтад эс гиҗ талдан савд суулһсн цагт цаг яһҗ давснь медгдхш, олн зүсн зовлң, үүмүлҗәдг төр мартгдна, чееҗ сарултсн болҗ медгднә. Ода мана сурһульд кедү цецг урһҗахнь то-тоомҗ уга. Сурһульчнр альвлҗ цецгүдин хамтхасд таслхш, маднд нөкд болна. Сурһульд орҗ ирсн гиичнр алң болҗ иим дала цецгүд урһасар өврдгнь эднд ик бахмҗ үүдәнә, – гиҗ Наталья Бявяевна келв.
Дунд сурһулин һардачин келсәр, багшнр сурһульчнрт эргндк бәәдлиг харлһна, бәәсн һазран цевр-цер бәрҗ, модд болн цецгүд суулһснь туста болдгин тускар цәәлһҗ өгнә. Мана сурһулин бүрдәцд хаврин-намрин кемд субботник давулгдна, бидн хамдан һаза модд суулһнавидн. Нидн сурһульчнр эк-эцкнртәһән хамдан «Кишгтә өрк-бүлмүдин аллей» суулһсн билә. Сурһульчнр бичкнәсн авн төрскн һазр-усндан эңкр болҗ, эргндк бәәдлиг цеврәр бәрхин туст чик сурһмҗ авхла, өсәд-босхларн эдн йиртмҗд дурта болҗ өсхнь лавта, гиҗ Эрднь Викторович тоолна.
БАТАН Наталья
ЗУРГТ: Көвүдә дунд сурһулин көдләч Музран Наталья цецгүдин бәәдл шинҗлҗәнә