Иньгллтд – мана күчн

«Әрәсән келн-улс: негдлтд – мана күчн» гидг нертә хург Элстд болхмн. «Әрәсән келн-улсин ассамблейин» Хальмг региональн әңг эн керг-үүлвдриг бүрдәҗәнә. «Калмыкия» РИА-д эн төрт нерәдсн брифинг болв.
«Әрәсән келн улсин ассамблейин» Хальмг Таңһчин салврин ахлач Бембин Евгений эн ик хургин керг-үүлдврин тускар седкүлчнрт келҗ өгв. Хальмгин хотл балһснд һаха сарин 18 - 21-д келн-улсин ик хург болн гиҗәнә. Эн хург Хальмгт бәәдг келн-улсин сойлын бүрдәцсин элчнриг цуглулҗана. Эн үүлдврин йовудт «төгрг ширән» сүүр болхмн. Һаха сарин 19-д Хальмг ик сурһульд тернь болх гиҗ зуралгдҗана. Баһчуд дунд келн-улс хоорндк хәрлцән ямаран бәәдлд бәәхин туск төрәр тер сүүрт күүндвр болхмн. Элст балһсна дунд сурһулин сурһульчнр, дунд шишлң болн ик сурһулин оютнр тер күүндврт орлцхмн. КГУ-д сурчадг һазадын орна оютнр чигн тоолврарн хувалцхмн.
Хамгин һол үүлдврнь һаха сарин 20-д Элстд балһсна байрла ирлцҗ кегдхмн. Келн-улсин ик хург байрин бәәдлд секгдснә дару олн келн-улс эврә хот-хооларн әмтиг тооҗ, авъясмудан үзүлхмн. Келн-улсин хувцтаһан хамцу йовлһн даңгин ик соньмслт үүдәнә. Иньгллтин ик концерт бас соньн болх гисн ицл бәәнә.
Городовиковск районас тер байрт түрг-месхетинцнр ирҗ орлцхин тускар « Хальмг Таңһчин түрг –месхетинцнрин ниицән» гидг региональн олна бүрдәцин ахлач Раим Файзиев келҗ өгв.
Хальмг Таңһчин корейцнрин негдлт» гидг таңһчин олна бүрдәцин ахлач Улана Натальян келсәр, байрин йовудт болх олн үүлдврмүд дунд «Әрәсән келн-улсин ассамблей» зарлсн «Келн-улсин бахмҗ» гидг марһанд кен чигн күн орлцҗ чадхин тускар келв. «Гордость нации. РФ» гидг сайтд орад, марһана таалла таньлдҗ болхмн.
«Негдлт» гидг дагестанск сойлын-гегәрүллһнә төв» гидг региональн әңгин ахлач Написат Сулейманован тоолврар, келн-улс болһн билг-эрдмән үзүлҗ, хоорндан харһҗ, дамшлтарн хувалцҗ, байран хамдан келһн ода сән авъяст тохрҗана.
Хальмгт бәәх олн келн-улсин хамцу ик байрт талдан һазрас гиичнр ирх гиҗ күләгдҗәнә. Хальмг Таңһч олн келн-улс ни-эвәр бәәх һазр гиҗ тоолгдна. Иим олн орлцата байрмуд улс хоорндк залһлдаг улм батлна.
ҖИРҺЛИН Кермн