Өнчәр өссн улст дем өгв

Һаха сарин 9-д Хальмг Таңһчин залврин герт сурһуль-эрдмин болн номин министрин үүл дааҗадг Александр Ким өнчәр өссн баһчудт гер эс гиҗ патьр хулдҗ авх арһ өгчәдг итклин цаас бәрүлҗ өгв. Келхд, иим цаасиг Болдра Александр, Валетин Иван болн Сарңга Екатерина авв.
Өнчн арвтнриг 18 нас наслсна хөөн шаңһас гер-бүүрәр теткх зөвтә болна. Болв чеерүд ик болад эдн хөөннь итклин цаас эс гиҗ орн-нутгин сертификат олзлҗ патьр эс гиҗ гер хулдҗ авна. Тиим зөв баһчудт 23 наснас авн өггднә.
Болдра Александр ода эврә өрк-бүлтә, көвүнь сурһульд орҗана. Эврә гер уга болад, эдн патьр нәәмәдлҗ бәәнә. Болв ода таңһчас итклин цаас авсна хөөн Александр Владимирович эврә гер хулдҗ авхар зуралҗана. Гернь ода күцц кевәр тосхгдад уга, болв Александр Владимирович тосхлтын бүрдәцлә бооца батлсн бәәнә. Өнчн улс 2 сай арслңга шаңһа демиг олзлад эс гиҗ деернь эврә мөңгән немәд гер-бүүр хулдҗ авч чадна. Тер мет Болдра Александр мөңгән немәд өрк-бүлтәһән шин бүүртән орхар зуралҗана. Өөрхн иргчд эднә төр хаһлгдх гиҗ Болдрахнахн бат итклтә бәәнә, тиигхлә эдн шин бүүрән йостаһар йөрәҗ, элгн-садтаһан байрарн хувалцх. Оратҗ герч цаасн өггдсн бийнь өрк-бүлнь ик байрта бәәнә, таңһчин Толһач Хаска Батуд, министрин үүрг дааҗадг Александр Кимд ханлтан өргв.
Сарңга Екатерина бас Элстд патьр хулдҗ авхар зуралҗана. Эн ода талдан балһснд көдлҗәнә, тегәд гертнь элгн-саднь бәәхмн. Валетин Иван бас кесгтән иткл цаасан авхар көөлдәд аштнь гер-бүүр хулдҗ авх арһта болв. Эн бас таңһчин һардврт ханлтан өргәд, ода чеерүдт зогсчадг баһчудт дөң болхар дамшлтарн хувалцхар бәәнә. Ямаран эрлһ яһҗ бичхинь эн сәәнәр меднә, тер медрлән баһчудт цәәлһҗ өгхәр седҗәнә.
Сертификатыг болн герч цаасиг Әрәсән ямаран чигн регионд олзлҗ, тенд гер-бүр хулдҗ авч болҗана. «Таңһчин һардвр өнчн баһчудт сән таал тогтахар седҗәнә. Эндр бидн 3 күүнд герч цаас бәрүлҗ өгвидн. Ода деерән 200 һар күн ирлцңгү чеерүдт зогсчана. Эдн цугтан кергтә бәрмт цаасан орулҗ өгх зөвтә. Эн җил 71 өнчн күүнд сертификат өгхин төлә таңһчин хазнд мөңгн батлгдсмн. Ода деерән 5 шаңһа болн 3 таңһчин сертификат бәрүлҗ өггдв»,- гиҗ министрин үүл дааҗадг Александр Ким келв.
Тиим кевәр өнчн баһчудыг гер-бүүрәр тетклһнә төр баһ-саһар болв чигн хаһлгдҗана. Өөрхн иргчд тер демин кемҗән өсәд бәәхиг күләҗ болҗана, тиим кевәр өнчн-өвү улс заканла ирлцәтәһәр җирһлин таалан ясрулҗ чадх.

ҖААХАН Бадм