Өвәрц сәәхн хальмг хувцн

Шидр бидн келн-улсин хувцна Өдр темдглсн биләвидн. Хальмг Таңһчин Толһач Хаска Бату хальмг хувцна тускар ухан-тоолврарн хувалцв.
- Эндр келн-улсин хувцн өдгә цага дизайнермудын кегдлмүдт тохрагдҗана. Өдгә цага кев-янзта хальмг хувцна туск олн зүсн тоолвр бәәхиг меднәв. Мини тоолврар болхла, мана хувцн сольгдсн бийнь келн-улсин кев-янзта болх зөвтә гиҗ санҗанав. Өвкнриннь байн зөөриг ясрулҗ кеерүлдг дизайнермүдиг бидн дөңнҗәнәвидн. Келн-улсин хувциг өдгә цага кев-янзтаһар үүдәхин тускар эрдмчнрлә үүдәгч үүлдвр бүрдәхиг таңһчин экономикин болн хулд-гүүлгәнә министерствд даалһвр өгчәнәв, - гиҗ Бату Сергеевич келв.
Келн-улсин хувциг өмсәд бахтх кергтә гиҗ таңһчин Толһач нег һазра улст дуудвр кеҗ, терүнә чинрин тускар бичкдүдт цәәлһтн гив. «Хотын сәәнинь гиичд өг, хувцна сәәнинь эврән өмс» гиҗ мана өвкнр хара биш келдг бәәсиг Хаска Бату тодлулв.
* * *
Кезәнә хальмг күүкд улс өмсч йовсн хувцн Лаганьд хадһлгдҗана. Давсн зун җилин һучдгч җилмүдт тер хувцн уйгдсмн гиҗ тоолгдҗана.
Өдгә цаг күртл хадһлгдсн ор һанцхн иим хувцн болҗана. Хувцна эднь, терүг ишксн болн уйсн шаглр болһнь йир эвтәһәр, күцц сәәнәр кегдснь оньг авлна. Урн һарин тиим эрдмтә улсиг ода олхд берк. Ик зуудан мадн «көндлң зү һартан бәрҗ чаддго», тус уга болвидн, мел белн хувцар бәәнәвидн. Хәләтн ямаран зег-кеерүл терүнд орулгдҗ. Зургиг хәләһәд чигн эн хувцн һартан өөтә, урн күүнә эвтә һарар уйҗ кеерүлгдснь медгднә. Күүнә һарар уйгдсн хувцн гиҗ келҗ болхий?
Эн сәәхн хувцн Н. Пальмовин нертә Келн-улсин музейин Лаганя әңгд хадһлгдҗана.
ҖИРҺЛИН Кермн