Селәнә әмтнд - театрин наадд

Басңга Баатрин нертә Келн-улсин театр һаха сард дарани үүлдврән эклв. «Я - Будда» гидг көгҗмин поэман болн «Небесная защитница» гидг наадан райодын әмтнд үзүлхәр театр һарч йовв.
Һаха сарин 12-т театр нааддан Троицкое селәнд үзүлв. Һаха сарин 15-д театрин эн хойр нааднла Ик-Буурла района хәләһәчнр таньлдв. Сойлын болн билг-эрдмин района төвд бичкдүдт нерәдҗ, «Небесная защитница» наадн үзүлгдв. Асхар болхла, «Я – Будда» гидг наадыг хәләхәр олн улс цуглрҗ ирв. Баһ Дөрвдә әмтн театрин наадыг һаха сарин 16-д хәләхмн.
Театрин коллектив һаха сарин 17-д Приютное селәнд одхмн. Городовиковск района хәләһәчнр театриг һаха сарин 18-д тосч авхмн. Садовое селәнд күрч һаха сарин 22-т театрин артистнр нааддан үзүлхмн.
Эн наадд әмтнд өңгәр үзүлгдхинь темдглх кергтә. Шаҗна нарт-делкән ик хург угтад, Басңга Баатрин нертә Келн-улсин театр эн нааддан райодын болн селәдин улст белглҗәнә.
ҖИРҺЛИН Кермн