Хальмг тег – оютнрин зургудт

Нарт-делкән шаҗна ик хург угтад, Элстин 160 җилин өөнд нерәдәд, хотл балһснд кесг тоотнь шинрүлгдҗәнә.
Пушкинә нертә уульнцд үүдәгч мастерской көдлмшән эклв. Чонкуша Петрин нертә билг-эрдмин колледжин оютнр соньн сәәхн зург экләд зурҗана. Эдн багш Куберлинә Андрейин һардврт терүгән күцәҗәнә.
Хальмг өргн тег болн энүнә сәәхн тоотыг зургтан тодлулад, Хальмгт ирсн күн болһн таңһчин өвәрц сойлла таньлдҗ, теегин соньн бәәдлиг седклдән тодлҗ авч хәрдгәр ик үүдәврән кехәр оютнр шиидв. Эн һазрт өсч-боссн бамб цецгин сәәхниг үзҗ, хаврт дуран өгсн, теегин салькнд батрсн оютнр зургар дамҗад төрскн һазртан эңкр улс болҗахан медүлхәр шунҗана. Балһсна өндр кесг герин эрсмүдиг ке-сәәхн зургудар кеерүлсн багшнь Куберлинә Андрей эднд үлгүр болҗана.
Төрскн һазрин һәәхмҗтә бәәдлиг, хальмгудын сойлын өвәрциг болн оюни зөөриг үзүлх күслтәһәр үүлдҗәдг баһ наста зурачнрин үүлдврнь күцәмжтә болтха.
ҖИРҺЛИН Кермн