Төрскнч седклтә көвүдәхн

Ик Буурла района Көвүд селәнд төрскн һазртан эңкр 400 шаху күн бәәнә. Эдн өвкнриннь санл тевчҗ, дорас өсч йовдг баһ үйнрт чик сурһмҗ өгч, тууҗан болн авъясан хадһлҗ отг-әәмгән делгрүлхәр шунна. Хөрн һар җил хооран селән күртл хату девскртә хаалһ тосхгдсмн, әмтнә гермүдт газ орулгдсмн. Селәнд эмнлһн, дунд сурһуль, сойлын Гер, поштын әңг болн лавк бәәнә. Көвүдәхн селәндән сән таал тогтахин төлә шаңһа көтлврмүдт орлцҗ, олн зүсн төсвс бәәдл-җирһлд тохраҗахнь темдгтә.
Селәнә муниципальн бүрдәцин толһач Энкән Байна келсәр, бәәрн улс спортын болн бичкдүд нааддг талвңгуд тосхлһна төсвс күцәв. Әмтнә седвәр дөңнҗ таңһчин хазнас мөңг йилһҗ өгдг көтлврт эдн орлцад, цөөкн җил хооран цогц-махмудан батрулдг болн бичкдүд нааддг талвңгуд тосхсмн. Эн җил болхла Төрскән харсгч Алдр дәәнд диилвр бәрснә 80 җилин өөнд нерәдҗ Диилврин парк секв. Эн төсв күцәлһнд шаңһас 2 сай 400 миңһн арслң йилһгдсн билә, селәнә әмтн 300 миңһн арслң немх зөвтә бәәсмн, болв цуһар эн кергиг дөңнәд, 400 миңһн арслң цуглулв.
- Алдр Диилврин 80 җилин өөн угтҗ Төрскән харсгч дәәнд орлцсн нег һазра мана улсин санл мөңкрүллһнә әрүн чинртә керг күцәввидн. Мана селәнәс 145 күн аврлт уга дәәнд орлцсмн, бидн күн болһна неринь зааҗ, зургинь барлҗ чолун самбр секвидн. Тер мет энд Чернобыльд, цергә шишлң керг-үүлдврт болн талдан дәәнд орлцсн нег һазра улст бас самбр углҗ тәвгдв. Арһлачнр дәәнә ветеранмудт нерәдгдсн Диилврин парк секлһнә төсвин тускар медәд, дөң-тусан күргҗ, туслмҗин үниг баһрулв. Бәәрн улс эврә седвәр татад, бас нөкд болхар шунв. Тиигәд, Бандан Михаил парк тосхх ормиг цеврлҗ белдв, Картин Станислав нүк малтв, Казим-Паша Магомедов элс авч ирв. Селәнә улс болн сурһульчнр шин паркд һацур, уласн болн харһа модд суулһв. Тиигәд цуһар арһ-чидлән негдүләд, хамдан паркиг тосхлһна көдлмшиг сара хонгтан дарунь күцәһәд, хөн сарин 7-д Диилврин өөн угтҗ байрин бәәдлд секвидн, - гиҗ Байн Бадмаевич келв.
Селәнәхн әмтнә седвәр дөңнлһнә көтлврт бас нег орлцҗ мини-футбол нааддг талвң тосххар зуралҗана. Келхд, селәнд ик-бичкн уга футболд дурта. Бәәрн дунд сурһулин «Арнзл» команд районд бәәтхә, таңһчд болдг марһаст нер һарна. Бичкдүд футболын, волейболын секцст шунмһаһар орлцна. Тегәд бичкдүд болн баһчуд цаган тустаһар давулҗ, спортар соньмсхин төлә сән таал тогтах кергтә гиҗ селәнәхн тоолҗана.
Көвүд селәнд 23 крестьянск-фермерск болн «Путь Ленина» эдл-аху көдлнә. Эдн социальн төрмүд хаһлхд дөң-тусан күргнә, буйнч седклтә керг күцәлһнд демән өгнә. Хальмг улсин Цаһан Сар, Зул байрин өдрмүдт эдн медәтнриг болн олн үртә өрк-бүлмүдиг махар теткнә. 2019 җилд СПК-н һардвр селәнә сойлын Герт ясвр келһнд дөң болсн билә. «Сойлын халхин шаңһа болн муниципальн бүрдәцсин шинрүллһн» гидг көтлврт орлцад, селәнә эдл-ахун дөңгәр сойлын Герт ораһинь, үүдд-терзмүдинь, электрокүчәр тетклһнә, түүмрәс саглуллһна кергслмүд шинрүлсн билә.
Селәнд хальмг, орс болн талдан келн-улс ниитә бәәнә, эдн эврәннь сойлан, авъясан хадһлҗ, байрин өдрмүдиг хамдан темдглҗ, ямр нег төр учрхла нег-негән дөңннә. Цергә шишлң керг-үүлдвр эклснәс авн селәнәхн СВО-д орлцачнрт дулан хувц, хот-хол, эм цуглулҗ йовулна, дунд сурһулин улд хорһн шам кенә, бу-селм бүркдг гөлм өлгнә. Эн селәнәс цергә керг-үүлдврт Николай Шавров, Лиҗин Владимир, Авшин Сергей орлцсмн. Сергей Владимирович ода төрскн селәндән бәәнә, сурһульчнр энүг ямр нег керг-үүлдврт дуудҗ, дару-дарунь харһна. Селәнә муниципальн бүрдәцин һардвр медәтнрт, цергчнрт болн олн үртә Җаңһр болн Дина Картеевихнә, Олег болн Нина Айгуровихнә өрк-бүлмүдт килмҗән тусхаҗ төрмүдтнь орлцна.
Энкән Байн бийнь эн селәнд өсәд-боссн күн болна, тегәд цугтаһинь сәәнәр меднә. Эн хальмг ик сурһульд зоотехникчин эрдм дасад, селәнә эдл-ахун халхд көдлҗ йовсмн. Селәнә депутатнрин Хургин шиидврәр 2013 җиләс авн СМО-н толһач болҗ көдлҗәнә. Нег һазра улс энүнд иткнә, тегәд Байн Бадмаевич үнн-чик седклтәһәр көдлхәр шунна.
БАТАН Сәәхлә
ЗУРГТ: Диилврин парк секлһнә байрин кем