Нег һазра цергчнрин санл мөңкрүлв

Яшкулин района Хар Толһа селәнд өсәд-боссн улс дунд цергә шишлң керг-үүлдврт орлцҗ, залу-зөрмгән үзүлҗ йовдг Төрскән харсачнр баһ биш бәәнә. һундл төрхд, эдн дунд ааһ-цусан асхч, әмән әрвллго цергә даалһвран үнн кевәр күцәсн нег һазра улс бас бәәхнь лавта. Энд өсәд, дунд сурһуль төгсәсн Аран Аркадий, Саңһҗин Евгений, Диджан Константин болн Нәәмнә Виктор баһ-дүүвр насндан әмнәсн хаһцад, олна санлд мөңкинд үлдв. Шидр селәнд эднд нерәдҗ санлын самбр секгдв.
- Нег һазра мана улсин седвәрәр бидн мана цергчнрт санлын самбр секх шиидвр авсн биләвидн. Эн әрүн чинртә керг күцәлһнд Яшкулин района муниципальн бүрдәцин һардвр дөң-тусан күргв. Санлын самбриг Төрскән харсгч Алдр дәәнд орлцсн нег һазра мана улст нерәдгдсн санлын бумбин өөр углҗ тәввидн. Энд дәкәд Бодь суврһн босхгдсн бәәнә. Иргчдән энд сән кец-таал тогтаҗ, цецгүд суулһхар зуралҗанавидн. Эврәннь үрән геесн эк-эцкнрин зовлңгиг бидн хувалцҗ, чадсарн эднә төрт орлцҗ, ямр нег сурвр учрхла нөкд болнавидн, – гиҗ Хар Толһа селәнә муниципальн бүрдәцин толһач Басңга Алексей келнә.
Санлын самбр секлһнд Яшкулин района цергә комиссар Ванькан Николай орлцад, Төрскән харсачнрин санл мөңкрүллһн дааврта болҗахиг темдглв. Эн самбр цергчнрин санлыг мөңкрүлҗ, дорас өсч йовдг үйнрт эднә залу-зөрмгин тускар тодлулх гив.
Давсн җилин чилгчәр цергә шишлң керг-үүлдврин йовудт әмнәсн хаһцсн Аран Аркадин экнь Александра Ивановна эднә көвүдин санл мөңкрүлҗ, самбр секх керг күцәсн нег һазра улстан ханлтан өргҗ, шүлг айслулҗ умшв. Медәт олн зүсн цецгүд урһахдан дурта, тегәд санлын самбрин шидрт оошк цецгүд суулһх седвәрән медүлв. Аркадь көвүнь Хар Толһа селәнә дунд сурһуль төгсәснә хөөн Ар үзгин Кавказд хойр җилдән церглҗ йовсмн. Цергәс бууҗ ирәд, эн 2004-2006 болн 2007-2009 җилмүдт Әрәсән харслтын Министерствла бооца батлҗ, цергә даалһвр күцәҗ, олна төлә әәмшг уга бәәдл тетклһнә халхар церглҗ йовсмн. Дән-даҗг болсн һазрт залу-зөрмгән үзүлсн төләдән эн олн ачлвр авсмн. Цергә шишлң керг-үүлдвр эклхлә эн түрүн зергләнд цергә бооца батлад, Төрскән харсв. Эн хаврар Хар Толһа селәнә дунд сурһульд энүнлә хамдан сурч йовсн үүрмүдин седвәрәр Аран Аркадин санлд нерәдгдсн «Баатрин ширә» секгдв. Терүг секлһнә керг-үүлдврт элгн-саднь, багшнр болн сурһульчнр орлцв. Сурһулян йилһән сәәнәр сурдг, олна бәәдл-җирһлд орлцдг күүкд-көвүд терүнә ард суух зөв авна.
Алексей Лавгаевичин келсәр, бәәрн улс цергә шишлң керг-үүлдврт орлцҗадг нег һазра улст дөң-тусан күргҗ, дулан хувц-хунр, хот-хол цуглулҗ йовулна. Цергчнрин өрк-бүлмүдт селәнә бүрдәцин һардвр онц килмҗ тусхаҗ, гер-бүүрин, хаша-хаацин ясврт дөң күргнә. Ямр нег сән өдрин байр болхла, цергә даалһвр күцәҗ йовдг нег һазра улсин эк-эцкнрт белг белглҗ йөрәнә. Цергә даалһвр күцәҗ йовдг дәәчнр бахмҗ үүдәҗ, Төрскән харсгч Алдр дәәнд залу-зөрмгән үзүлсн аавнриннь үлгүрәр йоста баатр кевәр дәәлдҗ йовна.
ДООҖАН Наталья
ЗУРГТ: Яшкулин района Хар Толһа селәнд санлын самбр секгдв