Ик Буурла һардвр – багшнрт

Райодын болн теднә селәдин сурһульмудт багшнр күртҗәхш гисн төр тавн-зурһан җиләс нааран һара. Терүг күцәлһн амр биш керг. Ик Буурла района һардвр болн депутатнр терүнд ик оньг тусхаҗ, нааран көдлхәр ирҗәдг багшнрт 1 сай арслңга немр дем өгх шиидвр батлад, тиим кевәр бәәдлиг ясрулх эв-арһ олҗ авв. Эн седвәрин тускар бидн района толһач Кекән Арсланла (зургт барун таласнь) күүндвидн.
- Мана района селәдин сурһульд көдлх багшнрла, ут-турштан 10 күүнлә, һурвн җилин болзгта бооца батлв. Һаха сарин нег шинәс эдн Ик Буурла района селәдин сурһульмудт көдлҗәнә. Бидн багшнриг урмдулхин төлә 1 сай арслңга дем өгвидн. Селәнә сурһулин бүрдәцст зәрм багшнр уга болсна учрар чинртә бәәдл учрв. Үлгүрнь, нег селәнә сурһульд хойр җилдән физикин эс гиҗ эсвин багш уга болад, күүкдт һоллгч тиим кичәл өггдсн уга. Тер мет химийин болн биологийин багш бас уга билә. Нам района төв Ик Буурл селәнә сурһульд тиим төр учрсмн, – гиҗ Арслан Андреевич мана күүндвриг эклв.
Нег сай арслңга дем авад, бооца батлад Ик Буурла дундын сурһульд Сарңга Сергей (физикин багш), Эрднин Светлана болн Шошуна Марина (хоюрн эсвин багшнр), Манҗин Светлана (тууҗин багш). Шошуна Марина хойр сай арслңга дем авв, яһад гихлә эн «Земск багш» гидг шаңһа көтлврт дегц орлцв. «Мана тал ирсн цуг багшнрт бидн ханлтан өргҗәнәвидн, теднә седклинь күндлҗәнәвидн, тегәд талдан көтлврәр орсн багшт бас демән өгвидн», – гиҗ Арслан Андреевич эн туст тоолвран келв.
Орһахна дундын сурһульд болхла тууҗин багш Конян Баир, Саңһҗин Людмила (орс келн болн утх зокъял), Мельтинә Эльза ирв. Приманыч селәнә сурһульд физикин багш Лиҗин Эрднь көдлх. Көвүд селәнә сурһульд англь кел Босхмҗин Александра дасхх, Ут Салад орс келнә болн утх зокъялын багш Умкен Любовь ирҗ көдлҗәнә. Тер мет «Земск багш» көтлврәр Ик Буурла, Приманыч, Зултрһн селәнә сурһульмудт эсвин, англь келнә болн хальмг келнә һурвн багш көдлҗәнә.
Тиигчкәд Ик Буурла районд ирсн мергҗлтнриг медәтә эс гиҗ баһ наста гиҗ йилһвр уга гиҗ Арслан Андреевич келв. Кергән меддг сән мергҗлт ик дамшлт хоршасн болхла, терүг эрк биш көдлмшт авна. Элстәс байн дамшлтта багшнр ирснь байрта. Эдн физикәр, эсвәр сән белдвр кеһәд, Ик Буурла билгтә арвтнр ик сурһульд орхин төлә сән ул-сүүр тогтах.
Өцклдүр бидн мана района селәдт ирсн багшнриг йөрәһәд, эднд иткл цаас бәрүлҗ өгвидн. Ик Буурла дундын сурһулин улд ик хург давулад, багшнриг дөңнллһнә керг-үүлдврин тускар Яшалтан, Городовиковск, Приютна болн Целинн райодын багшнрт келҗ өгвидн. Таңһчин сурһуль-эрдмин болн номин министрин үүл дааҗадг Александр Ким тер керг-үүлдврт орлцҗ мана седвәриг дөңнв, гиҗ күүндврин йовудт Ик Буурла района толһач темдглв.
Тернь района делгрлтд, ода өсчәх үйнрт сән сурһуль-эрдм өглһнд туслх керг болҗана. Өсәд, босад арвтнр бас олн салврин мергҗлтнр болҗ Ик Буурла района өргҗүллһнд нилчән күргәд бәәх гиҗ района һардвр ицҗәнә. Тиим бооцан иргчдән талдан багшнрла чигн батлгдад бәәх. Ода ирсн мергҗлтнр цааранднь чигн районд көдләд бәәх гиҗ района һардвр бат ицгтә бәәнә.
Багшнриг урмдуллһна халхар Ик Буурла района һардврин күцәҗәх үүлдвр талдан райодт чигн үлгүр болад бәәх гиҗ сангдна. Сурһульта, медрлтә баһчудыг өсклһн эндр өдр ик чинр зүүҗәнә. Бичкн селәнд, ик балһснд чигн сурчадг күүкд әдл медрл авх зөвтә, тиим неквр ода тәвгдҗәнә.
ҖААХАН Бадм