Сән иргчин төлә дууһан өгв

Хальмг Таңһчд амрлһна өдрмүдт, һаха сарин 13-д болн 14-д, райодын болн селәдин муниципальн бүрдәцсин депутатнрин суңһвр болв. Тер мет Яшкулин болн Хар һазра райодын иргнмүд Хальмг Таңһчин Улсин Хуралын (Парламентин) депутатыг суңһв.
Партьс болн олна бүрдәцс эн керг-үүлдврт шунмһаһар орлцв. Тиигәд, «Негдсн Әрәсә» партин таңһчин әңг РМО-н кемҗәнд 220, СМО-н депутатнрин ханьд 882 кандидатыг зааҗ темдглв.
Тер мет КПРФ-ин Хальмг әңг – 200, «Үнн-чик седклтә Әрәсә - Патриотмуд - Үннә төлә» гидг парть – 77, ЛДПР – 35, «Шин улс» парть – 26 гешүдән заав. Бийән заасн кандидатнр нег мандатта суңһврин округудт элчлгдв. Тиим кевәр Хальмг Таңһчар бүклдән авад хәләхлә депутатын 1088 мандат авхин төлә 1440 күн дөрлдв.
- Мана районд суңһвр сән йовудтаһар болҗана, урдаснь бидн цуг 15 әңгәр суңһврин шишлң цаас йовулчклавидн. Әмтн хальмг улсин хувц өмсҗ байрта-бахта седклән үзүлҗ суңһврт орлцҗана, яһад гихлә һаха сарин 13-д бидн хальмг улсин хувцна Өдр темдглҗәнәвидн, тиигәд хойр сән өдриг негдүлҗ мана бәәрн әмтн авъяст тохрсар шунлттаһар суңһврт орлцҗана, – гиҗ Үстин района суңһврин бәәрн комиссин ахлачин дарук Төлҗин Наталья келв. Райоһар авад хәләхлә һаха сарин 14-д 13 час күртл суңһачнрин 30 һар процентнь дууһан өгсн билә.
Бүклдән таңһчар авад хәләхлә деер заасн кем күртл Хальмг Таңһчин Улсин Хуралын (Парламентин) депутатын немр суңһврт суңһачнрин 43 процент дууһан өгв гиҗ таңһчин Суңһврин комиссь зәңглв. Тер суңһвр нег мандатта 11-ч тойгта округар болҗана. Райодын болн селәдин муниципальн бүрдәцсин хургудын депутатнрин суңһврт 37 процент әмтн дууһан өгв. 18 часла тер ашнь 54 болн 46, 5 процент болҗ йилһгдв. Тиим аштаһар 2025 җилин суңһвр давв. Хальмг Таңһчин Олна палатын гешүд райодар болҗах суңһврин йовудыг бүрткҗәлә. «Суңһвр өөдән кемҗәнд давҗана, таңһчин әмтн шунлтан үзүлҗ дууһан өгчәнә, суңһврин әңгүдт сән бәәдл тогтсн бәәнә. Әмтн байрта-бахта седклән үзүлҗ өрк-бүләрн, хамдан көдлҗәдг үүрмүдтәһән ирҗ, нег-негән суңһврин өдрлә йөрәҗәнә. Баһчуд олна керг-үүлдврт шунлттаһар орлцҗана, тернь байр үүдәҗәнә, – гиҗ Олна палатын гешүд Виталия Кокаева зәңглв.
- Суңһврин түрүн өдрлә райодар болн селәдәр цуг суңһврин әңгүд цаглань 8 часла секгдв. Әмтнә кесгнь болн комиссьмүдин гешүд өвкнрин хувц-хунран өмсҗ ирв, яһад гихлә эн өдр бидн бас хальмг келн-улсин хувцна Өдр темдглҗәнәвидн. Тегәд тернь хойр дам байр болв, – гиҗ Олна палатын аппаратын һардач Эрднин Анатолий темдглв. – Дууһан өглһн заканла ирлцәтәһәр дигтә-даратаһар күцәгдв. Әңг болһнд Олна палатын бүрткәчнр бәәнә. Ут-турштан 178 әңгд суңһвр болҗана. Олна палатын талвңгудт суңһврин йовудын тускар өргнәр зәңглгдҗәнә, гиҗ олна бүрдәцин элч келв.
Тер мет суңһврин йовудыг Олна палатын мониторингин багмуд бүрткҗәлә. Дәкәд болхла суңһвр болҗах өдрмүдт Олна палатын ситуацин-зәңгллһнә төв көдлв, тиигәрән бүрткәчнр цуглулсн зәңгән, то-дигән йовулҗана гиҗ Анатолий Александрович цәәлһв.
Суңһачнрин нерн деерәс Хар һазра района Адг селәнә бәәрн күн, селәнә дундын сурһулин һардач Манҗин Мария тоолвран келв. «Мана цуг багшнр мет, би бас района болн селәнә сән иргчин болн цецгәрлтин төлә дууһан өгв. Мана депутатнрин кандидатнрин тоод баһ наста кесг улс йовна, эдн теднд даалһсн кергиг даавртаһар күцәҗ, района болн Адг селәнә делгрлтд сән нилчән күргәд бәәх гиҗ батар ицҗәнәв, терүнә төлә цуг таал бәәнә. Мана сурһулин герт таңһчин Толһач Хаска Батун седвәрәр бат сән ясвр одахн кегдв. У-сарул бәәшңд хүврәд йостаһар хүврүлгдв. Мана депутатнр чигн Бату Сергеевичәс үлгүр авад тиим олнд туста кесг керг бәәдл-җирһлд тохраҗ чадх гиҗ нәәлҗәнәв», – гиҗ Мария Хулхачиевна тоолварн келв.
Шин суңһгдсн цуг депутатнр, тер тоод СВО-д зөргтә орлцачнр, төрскн райодын болн селәдин делгрлтд ик тәвцән орулҗ тедниг йостаһар хүврүлҗ чадх гиҗ олн әмтн нәәлҗәнә.
Хальмг Таңһчин Суңһврин комиссин зәңглсәр, урдаснь кесн то-дигәр Хальмг Таңһчин Улсин Хуралын (Парламентин) депутатыг суңһлһна немр суңһврт 6631 күн дууһан өгв, тернь спискд орсн цуг суңһачнрин тооһас 59,39 % тогтав.
Тиим кевәр Хальмг Таңһчин Улсин Хуралын (Парламентин) депутатд нег мандатта 11-ч тойгта суңһврин округар Бембин Санл суңһгдв, кандидат суңһачнрин 5330 ду хоршав, тернь 80,38% цуг суңһачнрин тооһас тогтаҗана, кандидатыг «Негдсн Әрәсә» ВПП-н КРО зааҗ темдглв. «Үнн-чик Әрәсә -Патриотмуд-Үннә төлә» гидг политическ партин таңһчин әңг зааҗ темдглсн Хаман Борисин төлә 602 суңһач дууһан өгв (9,08%). Тер мет кандидат Шахана Екатерина 603 суңһачин ду хоршав (9,56%). Энүг Әрәсән Либералын-демократин партин Хальмг региональн әңг зааҗ темдглсмн.

ТҮРВӘН Һуна