Хамдан көдлҗәсн үүрмүднь көлг белглв

Шидр Улсин фронтын Хальмг Таңһчд үүлддг әңгд Хальмг Таңһчин залврин Ахлач –таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан даалһврар энүнә дарук Мамина Ольга, Целинн района болн Элст балһсна әмтиг көдлмшәр тетклһнә цергллтсин һардачнр Лозуткан Николай болн Сумьяна Белла «Сарпа» дуудврта цергчд ГАЗель тамһта көлг болн бензинәр көдлдг көрә бәрүлҗ өгв. Улсин фронтын КРО-н зүүцүләч Гецела Зурһан шишлң көлг бәрүлҗ өглһнд бас орлцв.
2022 җилин намр күртл цергч Октябрьск района әмтиг көдлмшәр тетклһнә цергллтиг һардҗ йовсмн. Цергә шишлң керг-үүлдвр эклхлә, эн түрүн зергләнд Төрскән харсачнрин тоод орв. Дунд сурһулян төгсәснә хөөн эн Аһш балһснд селәнә эдл-ахун ик сурһульд сурсмн. Тенд цергә дамшлт хоршаһад, батарей заллһна взводын командирин цолта болсмн. Хөөннь эн Псковск мүҗд әәрмд церглсн билә. Энүнә келсәр, сурһуль сурчасн цагт хоршасн медрл әәрмд цергә даалһвриг күцәхд керглгдв. Цергә шишлң керг-үүлдвр эклхлә энүнд офицерин цолта болдг учрар цергә комиссариатас дарунь цаасн ирв. Эн удан ухаллго, цергә керг-үүлдврт орлцхар шиидв.
- Бидн мана министерствин, Элстд болн 13 районд үүлддг әмтиг көдлмшәр тетклһнә цергллтсин нерн деерәс маднла урднь көдлҗ йовсн үр-иньгт шишлң көлг болн көрә белглҗәнәвидн. Цергә даалһвр күцәһәд хаалһ уга һазрт сәәнәр йовдг көлгн кергтә болна, тегәд эннь мана цергчнрт диилвр бәрхд туслтха. Цуһар әмд-менд хәрҗ иртхә, - гиҗ Сумьяна Белла үүрмүдиннь нерн деерәс келв.
Василий Владимирович үүрмүдтән ханлтан өргҗ, нег һазра улсин буйнч седкл болн дөң ик чидл-омг өгдгиг темдглв. Ода эн Донецк Улсин Республикд Константиновка балһсна өөр шидр цергә даалһвран күцәҗ йовна. Эн артиллерий заллһна взводын командир болна. Энүнлә хамдан Үстин болн Сарпан райодас нег һазра улс церглҗәнә, эдн нег-негән хәләҗ, дөң болна. Эн көлгн бу-селм зөөлһнд, БПЛА заллһнд олзлгдхмн гиҗ эн келв.
- Цергә шишлң керг-үүлдврин өмн би дөрвн җилдән Октябрьск районд әмтиг көдлмшәр тетклһнә цергллтиг һардҗ йовлав. Гертм авальм болн һурвн үрм намаг күләҗәнә. 2022 җилин намрас авн цергә даалһвран күцәҗәнәв. Эндр нанла хамдан көдлҗ йовсн үүрмүдм иим шишлң көлг белглснь байрта йовдл болв, эн даалһвран күцәхд эрк биш туста болх. Харм төрхд, тенд көлгн һурвн-дөрвн сар болад эвдрнә, тегәд хаалһ уга һазрт күрхд тааста көлгн маднд кергтә. Дәкәд модд көрәдх көрә кергтә гиҗ сурлав, тегәд үүрмүдм терүг бас хулдҗ авснд ик ханлтан өргҗәнәв. Бичкн болв чигн дөң тенд ик урмд өгнә. Нанд нег дәкҗ Аһшин мүҗин Камышинск районас 3-ч класст сурдг күүкнәс бичг ирв, би терүг оньдин бийләһән хадһлнав. Бичкн күүкнә бүлән үг дәәнә һалд йовсн цагт омг өгч, арһ-чидлән агсч дәәлдхд ик урмд өгнә. Мана таңһчин әмтн цуһар цергчнриг дөңнҗ, диилврин өдриг өөрдүлхд тәвцән орулҗ йовна. Бидн эрк биш диилвр бәрҗ хәрҗ ирхвидн, - гиҗ Василий Владимирович келнә.
ДАВАН Наталья