Хургт орлцачнрт дөң болх улс

Шаҗна нарт-делкән ик хургин йовудт олн зүсн керг-үүлдврмүд болхмн, терүнд кесг орн-нутгас болн Әрәсән регионмудас гиичнр ирхмн гиҗ күләгдҗәнә. Ик чинртә хург өөдән кемҗәнд өргмҗтәһәр давхин, цуг харһлтс болн керг-үүлдврмүд дигтә-даратаһар бүрдәгдхин төлә эврә сән дурар үүлддг улсин дөң кергтә. Шидр «Калмыкия» зәңгллһнә агентствд болсн брифингд Хальмг Таңһчин баһчудын керг-төрин агентствин һардач Камиль Маркеев, волонтермудын көтлврин һардач Анхана Саглр, орн-нутгин сурһулин көтлврмүдин һардач Татьяна Играчёва болн таңһчин баһчудын Төвин ах мергҗлт Джоджинә Инесса орлцад, шаҗна ик хургт эврә сән дурар дөң болх улсин үүлдврин тускар келҗ өгв.
Камиль Маркеевин келсәр, шаҗна нарт-делкән ик хургин йовудт эврә сән дурар дөң болхин тускар 721 күн медүләд, эрлһән орулҗ өгв. Мана таңһчас бәәтхә, Әрәсән талдан регионмудас әмтн нарт-делкән ик хургин тускар медәд, терүг давуллһнд дөң-тусан күргхәр шунв. Хальмг Таңһчин Толһач Хаска Батун даалһврар болн таңһчин залврин дөңгәр манаһур талдан балһсдас ирх волонтермудыг гер-бүүрәр, хотар болн шишлң хувц-хунрар теткхмн. Ик хург болх өдрмүдт эдн дарунь нег-негнләһән бат залһлда бәрхин төлә «МегаФон» эдниг сән залһлдаһар теткхин төлә бооцан батлгдв. Тер мет эдн олна көлгәр өңгәр йовҗ чадхмн эс гиҗ одахн КТК-Р белглсн шин автобусар кергтә һазрт күрхмн. Олна дөңнлтин штабин улд волонтерск төв бүрдәгдв, - гиҗ Камиль Маркеев харһлтыг секч келв.
- Шаҗна нарт-делкән ик хургин йовудт болх сүүрт, сойлын болн спортын керг-үүлдврмүдт, Бурхн Багшин әрүн чинртә тоотын һәәхүлд олн гиичнр болн таңһчин улс орлцхмн, тегәд эднд эврә сән дурар үүлддг улс дөң-тусан күргҗ, олн зүсн төрәр цәәлһвр өгхмн. Ода деерән 400 күн йилһҗ авгдв, тедн дунд сурһульчнр, оютнр болн медәтнр чигн бәәнә. «Серебряные волонтеры» региональн әңгин гешүд олн зүсн керг-үүлдврмүд давуллһнд байн дамшлт хоршасмн, тегәд эдн баһчудла зерглҗ шулун-шудрмг кевәр үүлдҗ гиичнрт дөң болхмн. 400 волонтерас 70 күн Әрәсән 38 региона элчнр болна. Эврә сән дурар үүлддг улс гиичнрт дөң болсн деерән хоорндан таньлдҗ, бас олн зүсн керг-үүлдврт орлцхмн, эднә төлә соньн көтлвр белдгдв.Эдн һаха сарин 21-д Көтчнр селәнд шин хурл секлһнә байрт бас одхмн. Талдан балһсдын волонтермуд һаха сарин 19-әс авн манаһур ирхмн, - гиҗ Анхана Саглр цәәлһв.
Татьяна Играчёва мана таңһчур түрүн болҗ ирсмн, эн эврә сән дурар үүлдх улсин сурһуль давулҗ, олн-әмтн орлцдг керг-үүлдврмүд давуллһна туст сүв-селвг өгч, дамшлтарн хувалцхмн. Энүнә келсәр, волонтермудын цаһан седкл, шунлт болн седвәр ямаран чигн керг-үүлдврин һол ул-сүүр болна. Эднә дөңгәр ик хургуд, керг-үүлдврмүд, наадм бүрдәмҗтәһәр давулгдна, эдн гиичнрт төрскн һазр-уснаннь тускар тодрхаһар келҗ өгнә.
Нарт-делкән ик хургин йовудт Элстд «Дух Дхармы» шатрин марһан болхмн, терүнд һазадын орн-нутгудас шатрчнр ирхмн. Тегәд волонтермуд терүг давуллһнд бас дөң болхмн. Шаҗна ик хургт һазадын орн-нутгудас бас кесг гиичнр ирхмн, тегәд орчулачнр кергтә болхмн гиҗ Джоджинә Инесса келв. Ода деерән орчулач болҗ дөң болхин тускар 140 күн медүлв, теднәс 57 күн шүүҗ авгдв. Делегацсин то күцц медгдхлә, орчулачнрин то немгдхмн.
Мана волонтермуд цуһар төрскнч седклтә, шулун-шудрмг, седвәртә, билгтә, цаһан седклтә улс мөн. Эднә дөңгәр шаҗна нарт-делкән ик хургт орлцачнрт Хальмг Таңһчд эрк биш таасгдх гиҗ харһлтд орлцачнр темдглв.
ДООҖАН Наталья