Москваһас поезд ирх

Шаҗна нарт-делкән ик хург угтҗ һаха сарин 23-д Москва балһснас Элстүр поезд һарч йовхмн. Терүнә тускар Хальмг Таңһчин сойлын болн зуульчллһна министрин дарук Михайла Баира болн зуульчллһ делгрүллһнә агентствин һардач Шурһчин Нина зәңглв.
Нина Бадмаевнан келсәр, поезд Москва балһсна Казанск вокзалас һарч йовад, Элстүр һаха сарин 25-д ирхмн. Поезд 3 купе болн 1 СВ вагон бәәхмн, ут тоодан 98 орм йилһгдҗәнә. Билетин үн 8-10 миңһн арслң болхмн. Билет хулдҗ авх саната улс 8 800 222 6608 тойгар җиңнүлҗ чадҗана. Поезд һаха сарин 28-д хәрү һарч йовхмн. Хальмг Таңһчин Толһач Хаска Батун болн таңһчин залврин дөңгәр эн поезд бүрдәгдв, «РЖД» ОАО эн төр хаһллһнд бас орлцв.
Бамб цецгин наадм болдг кемд зуульчнрин төлә бүрдәгддг поездын үлгүрәр шаҗна нарт-делкән чуулһнд орлцх саната улсин төлә бас поезд йовулх шиидвр авгдв. Немр авиарейсмүд бүрдәлһнә төрлә зерглҗ шишлң поезд йовх болҗ һарв. Ик хургт олн гиичнр ирхмн гиҗ зуралгдҗана, эднә төлә соньн керг-үүлдврмүд болхмн. Һоллгч керг-үүлдврмүд Хальмгин төв хурлд, «Ойрат-Арена» бүрдәцд, Хальмг ик сурһульд болхмн. Тер мет «Уралан» стадионд Джангариад болн спортын ик наадм, эн өдрмүдт «Миңһн байр», Игорь Бутмана концерт, Һурвн эрдньд көгҗмәр дееҗ бәрлһн болхмн, тегәд гиичнр соньнар болн сергмҗтәһәр цаган давулхмн. Москва балһснд бәәдг мана нег һазра улс бас эн поездәр ирҗ шаҗна чуулһна керг-үүлдврмүдт орлцҗ чадҗана гиҗ Баира Игоревна келв.

ДООҖАН Наталья