Күцәмҗтәһәр үүлдхиг дурдв

Давсн амрлһна өдрмүдт суңһврин негдсн Өдрлә мана таңһчд муниципальн бүрдәцсин депутатнрин суңһвр болв. Хальмг Таңһчин Толһач Хаска Бату дааврта керг-үүлдвриг бүрдәсн райодын толһачнрт, таңһчин залврт, дотр-дундын кергүдин болн бачм цергллтсин көдләчнрт ханлтан өргв.
Тер мет таңһчин Толһач суңһвр дигтә-даратаһар давулгдхиг бүртксн шинҗләчнрин, Олна палатын гешүдин, эврә сән дурар үүлдсн улсин тәвциг темдглв. Таңһчин суңһврин комиссин ахлач Чужан Бембәд болн суңһврин комиссьмүдин гешүдт цугинь өөдән кемҗәнд бүрдәснд онц ханлт өргв.
- Муниципальн депутатнр онц күслтә. Эдн әмтнлә цугтаһаснь бат залһлда бәрнә, эдн өдр болһн гилтә теднә өөр бәәҗ, тедниг ямаран төрмүд үүмүлҗәхиг медҗ дарунь хаһлна. Ода эдн әмтнә даавриг иткүлх зөвтә. Әмтн эднәс үнн-чик көдлмш, килмҗ болн ил күүндвр тогтагдхиг күләҗәнә. Ямаран партин элч болснь йилһвр уга, цуг маднд нег күсл бәәнә, энтн Хальмгин болн Әрәсән төлә негдҗ көдлх кергтә. Көдлмштн күцәмҗтә болтха, – гиҗ таңһчин Толһач дурдв.
БАТАН Наталья