Олн үртә Оконовихнә хөв-кишгнь

Үстин района Барун селәнд бәәдг Евгений болн Татьяна Оконовихн бийснь олн үртә өрк-бүлмүдт өссн төләдән бичкнәсн авн өр-өвч седклтә, килмҗтә, кен-негнләнь ээлтә улс болна. Арвн долан җил хооран ханьцад, эврә өрк-бүлән өндәлһәд, дөрвн үртә эк-эцк болсн деерән Евгенийин ачнриг асрлһнд авсмн.
Окна Евгений бийнь Барун селәнд өсәд-боссмн, баһ цагтан көгҗмин багд орад, района болн хам-хоша бәәдг селәдәр йовҗ, олн зүсн керг-үүлдврмүдт орлцдг бәәсмн. Нег дәкҗ эдн Иҗл селәнд ирҗ, билг-эрдмән үзүлсмн. Тенд Евгений Татьянала таньлдад үүрлв. Удан боллго баһчуд өрк-бүлән өндәлһх шиидвр авад, нәәрән кев. Нәәмн үртә өнр-өсклң өрк-бүлд өссн Татьяна бер болн тавн ах-дүүтә Евгений үртә эк-эцк болснь хара биш гиҗ сангдна. Ууһн Дорҗ ода арвн тавта, эн Элстд дунд шишлң сурһульд сурчана. Көвүн бичкнәсн авн спортар соньмсад, бөк бәрлдәнә болн волейболын секцст орна, олн зүсн марһаст күцәмҗ бәрнә. Дорҗ ардасн Бальҗр дү күүкиг дахулв. Эн ода Элст балһсна 12-ч тойгта дунд сурһульд орна, күүкн бас волейболар соньмсна, сурһулян арднь орҗ сәәнәр сурна. Отхн икр Иляна Байр хойр селәнә бичкдүдин садт орна.
- Авалин ахнь гемин уршгар сәәһән хәәснә хөөн дөрвн үрнь өнчрәд үлдв, тегәд бидн тедниг асрдг болвидн. Хойр ик күүкнь Элстд дунд шишлң сурһульд сурчана, дөнтә Алтн болн тавта Хоңһр ода мана икр күүкн-көвүнлә хамдан бичкдүдин садт орна. Герин эзн урднь мал асрад, селәнә эдл-ахун халхар көдлдг билә, нидн эврә сән дурар цергә шишлң керг-үүлдврт орлцхар шиидв. Цергә керг-үүлдвр эклснәс авн терүнд орлцхар зүткҗәлә, болв дөрвн бичкниг һанцарн асрхд күнд бәәсмн. Тегәд эдн бичкдүдин садт ордг болсна хөөн бооца батлв. Бидн бат залһлда бәрдг биләвидн, зуг хөн сарас авн авальм зәңг-зә уга бәәнә. Церглҗәдг һазртнь чигн одлав, - гиҗ Татьяна бер зовлңшҗ келв.
Ик күүкднь Элстд сурһуль сурч йовна, Татьянан экнь эдниг хәләҗ дөң болна. Иляна, Байр, Алтн болн Хоңһр насарн цацу, тегәд эдн хоорндан үгән олҗ ниитә бәәнә. Окна Татьяна Баруна сурһульд көдлнә, селәнә ямр нег керг-үүлдврмүдт орлцна. Сул цаг учрхла олн үртә эк юм уйна, шимтә сенр хот кенә. Күүкд күүнә келсәр, олн үрднь ик байр-бахмҗ үүдәнә. Бичкнәсн авн кен бичкнән хәләдг, ах улсиг тевчдг авъясиг күүкднь сәәнәр меднә. «Эдн өсәд-босхларн нег-негндән бат түшг болх гиҗ ицҗәнәв. Бичкдүд ахнрасн үлгүр авч чик авг-бәрцтә болхнь лавта. Эндр мана орн-нутгт олн үртә эк-эцкнриг сәәнәр дөңнҗ, олн керг-үүлдвр болн онц зөв демин мөңг өгнә. Эн җиләс авн мана таңһчд олн үртә өрк-бүлин сән Өдр зарлснь байрта. Мана эк-эцкнр, аав-ээҗнр олн үртә бәәсмн, тер авъясиг бидн мартх зөв угавидн», - гиҗ Окна Татьяна тоолҗана.
ДООҖАН Наталья
ЗУРГТ: өнр-өсклң Оконовихнә өрк-бүл