Селәнә сойлын көдләчнриг дөңнх

Хальмг Таңһчин Толһач Хаска Бату «Земск сойлын көдләч» гидг көтлврин аш диглгдснә тускар зәңглв. Шишлң комиссь селвлцснә ашт 1 сай арслңга дем авх 8 күн йилһҗ авгдв.
- Баһ наста мергҗлтнр – режиссермүд, хореографмуд, балетмейстермүд, дегтрин саңгин көдләчнр нәәмн района селәнә сойлын гермүдт болн билг-эрдмин сурһульмудт көдлхмн. Эдн тавн җилдән көдлхин туст бооца батлв. Әрәсән Президент Владимир Путинә даалһврар «Земск эмч» болн «Земск багш» көтлврмүд мет ирлцңгү төсв экләд күцәгдҗәнә. Эн көтлвр таңһчин райодт сойлын җирһлиг делгрүллһнд ик урмд өгхмн. Ирх җилд терүнд орлцх улсин то икдүлхвидн, тегәд нань чигн билгтә улс селән һазрт көдлҗ чадхмн. Өдр болһн гилтә билг-эрдм делгрүлҗәдг, мана тууҗ, кел, авъяс хадһлдг улсиг эрк биш дөңнх кергтә, - гиҗ Хаска Бату темдглв.