Элст балһсн өсәд-өргҗәд йовтха!

Мана таңһчин хотл Элст балһсн 160 җилин ончта өөндән күрв. Хальмг улсла хамдан мана Элст түрү-зүдү бәәдл дааҗ һарсмн гиҗ келҗ болҗана, дәәнә цагт хортн нааран дәврҗ ирсмн, тууврин җилмүдт эзн уга гермүд өнчрәд үлдсмн. Мана ах үйин улс төрскн һазрурн хәрҗ ирәд, эңкр Элст балһсан шинәс босхад тосхч авсмн.
Җил ирвәс хотл балһсн батрад, өсәд-өргҗәд, делгрв. Эндр мана бичкн балһсна тускар ик холд олн-әмтн меднә. Эн өдрмүдт болхла шаҗна нарт-делкән ик хургт орлцх гиичнр мана тал һазадын орн-нутгудас болн Әрәсән регионмудас ирхиг күләҗәнәвидн.
Элст күн болһна зүркнд онц орм эзлнә. Ик-бичкн уга эңкр балһсндан дурта, талдан һазрт одхларн санад, нааран хәрҗ ирхәр адһна. Эн балһснд кен негнь өсәд-боссмн, зәрмнь энд үр-иньгән олҗ өрк-бүлән өндәлһсмн, кесгнь энд сурад дамшлтта эрдмчнр болсмн. Мана хотл балһснд нерәдгдсн кесг дун болн шүлг бәәнә, терүг соңссн цагт күн болһна седкл байрар дүүрч, көрстә һазр деер бәәдг цуг балһсдас Элст хамгин дурта балһсн болҗахиг меднә.
Эн җил мана хотл балһсна 160 җилин ончта өөн шаҗна нарт-делкән ик хургла ирлцв. Әрәсән Президент Владимир Путинә даалһврар давулгдҗадг ик хург өргмҗтә кевәр бүрдәгдхин болн мана тал ирсн кесг гиичнриг өөдән кемҗәнд тосхин төлә ик белдврин көдлмш кегдв. Тосхачнр хаалһс ясад, урһа модна эдл-ахун көдләчнр цуг арһ-чидлән агсад һаң халунд амрл угаһар көдлҗ, Элстиг сәәхрүлҗ шинрүлхәр зүткв. Балһсна өөн угтҗ Элстд шин бумблвс, талвңгуд секгдҗәхиг балһсна бәәрн улс болн гиичнр икәр таасв. Өдр ирвәс мана балһсн өдгә цага болн келн-улсин кев-янзтаһар кеерүлгдҗәхнь темдгтә.
Балһсна өөнд нерәдҗ эн өдрмүдт кесг керг-үүлдвр болҗана. Сән авъяст тохрсар, балһсна делгрлтд тәвцән орулсн улсин ач-тус темдглхмн, өркән өндәлһҗәдг баһчудыг йөрәхмн, олн келн-улсин нәр болхмн. Байрин керг-үүлдврмүдин көтлврт эн җил шинрлтс орулгдсн бәәнә, тегәд түрүн болҗ «Би Элистина нертәв» гидг керг-үүлдврин йовудт күүкд улсин байр болхмн. Терүнд 50 һар күүкд күн орлцхан медүлв. Түрүн болҗ болх «Элст – дурта балһсм» гидг нәәрт Элстин туск дуд, шүлгүд умшҗ эңкр балһсндан көгҗмәр дееҗ өрглһнә керг болх. Дәкәд нохасин урлдан түрүн болҗ болхмн, эн үзмҗтә марһан кесг улсин оньг авлхнь лавта.
Элст балһсиг бидн мана теегин сувсн гиҗ нерәднәвидн. Җил ирвәс мана бичкн балһсн өсәд-өргҗәд, сәәхрәд йовтха гиҗ дурдҗанавидн. Элстд бәәдг өрк-бүлмүд өнр-өсклң болтха, балһсна делгрлтд тәвцән орулсн ах үйин улс ут наста болтха, олн келн-улс ни-негн бәәтхә!

БАТАН Сәәхлә