Энткгин оютнр Элстд ирв

Хальмг ик сурһулин багшнр Энткгәс ирсн оютнриг англь келәр тогтасн көтлврәр дасхлһиг эклҗәнә. Эднә баг эмнлһнә дацңд «Эмнлһнә керг» гидг мергҗләр сурх. Нәәмн оютнрас тогтсн түрүн баг Хальмг ик сурһульд ирсн бәәнә, эдн таңһчин һоллгч вузин һардач Салан Бадмла харһв.
- Эн өдрмүдт бидн цугтан Элстд һаха сарин 25-д Бурхн багшин шаҗна нарт-делкән чуулһн эклхиг теңкән угаһар күләҗәнәвидн. Тегәд эн кемд тана ирлһн бас ик чинр зүүҗәнә, тер йовдл бас тууҗд орхнь лавта. Энткгәс ик делегац ирх гиҗ күләгдҗәнә. Тиим кевәр мана Хальмг ик сурһуль чигн сойлын хоорндк ик күүндврин нег хүвнь болх, тер хәрлцәнә нег хүвнь тадн бас болҗанат.
Әрәсән сән гисн 100 вузин тоод «Приоритет-2030» гидг көтлврт Хальмг ик сурһуль орв, тернь цаарандк делгрлтин төлә йир сән таал тогтаҗана, – гиҗ Бадма Катинович темдглв. Тер мет мана вузд делкән 53 орн-нутгас оютнр сурчана. «Мана ик сурһуль кесг келн-улсиг негдүлҗәнә. Тадн кесг орн-нутгас ирсн баһчудла таньлдҗ, теднлә үүрлҗ чадхт, сурһулин йовудт багшнр, мана оютнр чигн таднд дөң болад бәәх, һазадын орна оютнриг дасхлһна халхар эдн ик дамшлт хоршасн улс, тегәд Энткгәс ирсн баһчуд мана вузд бат медрл авч сән эмчнр болхнь лавта», – гиҗ вузин һардач темдглв.
Харһлтд тер мет нарт-делкән төрәр һардачин дарук Конин Оксана, нарт-делкән үүлдврин заллтын һардач Ансельм Хундайи, сурһулин-методикин заллтын һардач Ороса Санл орлцв.
- Мана Энткг орн-нутгт Әрәсән ик сурһульмудла нөкцлтдг шишлң бүрдәц бәәнә, тедн мадниг Хальмг ик сурһульд эмчин эрдм даслһнд йовуллһна тускар үгцәвр батлв. Хальмг ик сурһульд орх саната баһчудла ик хург кев, хальмг вузин тускар чигн кесг тоот келҗ өгв, – гиҗ оютнрин багиг авч ирсн эднә куратор Вишной Виджай келв. – Мадниг Элстд сәәнәр тосв. Вузин һардач мана сурврт тодрха хәрү өгв, ода маднд цугнь медгдҗәнә, бидн маңна-тиньгр, байрта-бахта бәәнәвидн, - гиҗ Виджай келв.
- Элстд нанд икәр таасгдҗана, багшнр болн вузин һардач мадниг бүләнәр тосч сән харһлт кев. Тиим цаһан седклтә әмтн бәәдг һазрт би сурхар седҗәләв, – гиҗ Мукхерджи Джхинук оютн келв.- Цааранднь сурһуль эклхиг, маднд багшнр цугинь дигтәһәр цаһан седклән медүлҗ цәәлһәд бәәх гиҗ күләҗәнәв. Хальмг ик сурһулиг Әрәсән хамгин сән вузмудын тоод үзләв. Тиигчкәд Бурхн багшин шаҗнд шүтдг маднд өөрхн әмтн Европд һанцхн Хальмг Таңһчд бәәнә гиҗ медүв. Тернь мана Энткгин сойлла ик өөрхн юмн болҗана, тегәд энд бәәлһн сән таалта болх, гиҗ бидн бат ицгтә бәәнәвидн, - гиҗ эмнлһнә дацңгин оютн келв.
Хол Энткгәс тиим кевәр маднла нег шаҗна улс, түрүн баг баһчуд Хальмг Таңһчд ирҗ эмчин эрдм дасх, тиим дааврта кергт хальмг вузин багшнр болн оютнр түрүн саамд дөң болад бәәхнь лавта. Дәкәд эдн иҗлдәд йоста оютнр болҗ хальмг оютнрла үүрлҗ эрдмән сәәнәр дасч авх. Эмчин дааврта керг даслһнд эднд күцәмҗ дурдҗанавидн, цаһан седклтә, дөңгән күргәд бәәдг кесг үүрмүдән Хальмг ик сурһульд олҗ автн гиҗ йөрәҗәнәвидн.

ТҮРВӘН Һуна