Зуульчнрин төлә – шин гиичлүр

Элстд Шар шаҗна нарт-делкән ик хург угтҗ шин гиичлүр секгдв. Орн-нутгин регионмудар үүлддг «3А» гидг гиичлүр мана хотл балһсна ар-дорд үзгт зурһан сарин эргцд тосхгдад, эдлврт орулв. Зуульчлҗ йовдг улсин төлә хаалһин хаҗуд босхгдсн 13-ч гиичлүр удл уга түрүн гиичнрән тосхмн. Шидр гиичлүр секлһнд нерәдгдсн байрин керг-үүлдвр болв. Терүнд хальмг Таңһчин залврин Ахлачин дарук Александр Мишаков, таңһчин экономикин болн хулд-гүүлгәнә министр Чиҗин Андрей орлцв.
Гиичлүрин элч Александр Егай ирсн улст хорас үзүлв, энд өрк-бүләрн зуульчлдг улсин төлә ямр таал тогтагдсин тускар келҗ өгв. Келхд, эрмдгтә улсин төлә энд бас цуг таал бәәхнь темдгтә. Дәкәд зәрм әмтн ноха-миистәһән ирсн болхла тедниг бәрх орм бас тогтагдсмн. Гиичлүрин негдгч давхрт эврә кафе, һаза болхла көлгиг электрокүчәр тетклһнә станц бәәнә.
Таңһчин һардврин нерн деерәс Александр Мишаков йөрәлин үг келәд, зурһан сарин эргцд өдгә цага сәәхн гиичлүр тосхсн улст ханлтан өргв. Шин бәәрнд шар шаҗна нарт-делкән ик хургт орлцх гиичнр ирҗ бәәхиг дааврта һардач темдгләд, иим шин бүрдәцс тосхгдҗахнь зуульчллһ делгрүллһнд эрк биш туслх гив. Келхд, гиичлүрт мана бәәрн улс көдлҗәнә. Дәкәд энд мана таңһчур ирсн гиичнрин оньгт зуульчллһна ормс тусхагдҗана. Тиигәд, оошк нур, һанц уласн, Бурхн Багшин Алтн сүм, темәдин арл болн нань чигн орм заагдсн бәәнә.
Чиҗин Андрейин келсәр, Хальмг Таңһчин Толһач Хаска Батун нилчәр манад зуульчллһн өргнәр делгрҗәнә. Сүл җилмүдт мана таңһчур ирсн гиичнрин то өсәд йовхнь байрта, тегәд өдгә цага ке-сәәхн гиичлүр секгдснь әмтн сән таалд амрхд туслх гив. Орн-нутгин регионмудар гиичлүрмүд секдг компань мана таңһчд бас эврәннь гиичлүр тосхсн йовдл зуульчллһн делгрҗәхиг иткүлҗәнә гиҗ министр темдглв.
ДООҖАН Наталья