Шар шажна әрүн тоотыг хадһлхар

Одахн Москвад «Бумба» нертә дегтр һарһач «Хальмг Таңһчин шар шаҗна әрүн тоот» гидг дегтр барас һарһв. Керг күцәлһнд Хальмг Таңһчин залвр дөң болв. Тер ончта йовдлын тускар дегтр һарһачин ахлач Елена Киричек, номт Селән Цаһан болн зурач Нуура Герл келҗ өгв.
– Таңһчин төлә эн дегтр ик чинр зүүҗәнә. Энтн кезәнә бәәсн болн ода бәәдг цуг хальмг хурлмудын, суврһсин болн әрүн чинртә нань чигн тоотын тускар тодрхаһар медүлҗәнә, – гиҗ Елена Александровна күүндвриг эклв. – Дегтр түргн йовудтаһар кегдҗәлә, яһад гихлә болзгнь бас ахрхн бәәсмн. Мөрн сард көдлмшән экләд һаха сард терүг төгсәләвидн. Тиим йовудтаһар ода ховр бүрдәцс көдлнә. Цуг зургудынь Николай Бошев болн Лиҗин Һәрә цокч авв, эднә нерн таңһчд темдгтә. Тер мет дегтрин түүрвәчнр болн тогтаһачнрнь бас олнд темдгтә номт Селән Цаһан болн зурач, шар шаҗна билг-эрдмин шинҗләч Нуура Герл болв, эдн цуг зургудт цәәлһвр бичв, хәәврин болн нань чигн көдлмш күцәв.
Дегтр орс болн англь келәр һарв. Елена Александровна дегтр һарһачла нөкцлтдг орчулачнриг эн көдлмшт орлцулв. Тиим кевәр эн дегтр Элстд болх нарт-делкән ик хургт орлцачнрт сән белг болхмн, шар шаҗна тууҗар соньмсчадг улс дегтриг бас хулдҗ авч чадхмн. Болв зуг күсдундур миңһн дегтр һарһгдсн мөн.
Тер мет «Бумбан» нилчәр «Улаҗн Мергн баатр» гидг тууль хальмг болн орс келәр һарв. Селән Цаһан энүг орчулад цәәлһв. Цааранднь баһчудын болн сурһульчнрин төлә «Җаңһр» алдр дуулврин учр-утхар шогта зургудта дегтр һарв. Хальмг улсин алдр дуулврин һол учр-утхинь эн ахр үүдәвр сәәнәр цәәлһҗәнә. Тиим арвн дегтр өөрхн иргчд һархмн, алдр дуулврин 10 бөлгүдин тускар тенд келгдхмн.

ТҮРВӘН Һуна