Ке-сәәхн Элст гиичнрән тосчана

Эндр Элст балһснд шар шаҗна нарт-делкән хург көдлмшән эклҗәнә. Сүл җилин туршарт чинртә эн керг-үүлдврт белдәд, мана таңһчд, нег үлү Элст хотл балһсна уульнцс болн хаалһс ясгдад, нег һазра улсин төлә сән кец-таал тогтагдв. Элст балһсна һардвр ЭГС-ин депутатнрла хамдан эн көдлмшиг йовудыг бүртксн билә.
Элстин төвд ик, өргн көдлмш күцәгдснь цуһар үзҗәнә. Элстихн өдр болһн балһсна төвиг давҗ һарна, тер мет баһчуд энд цуглрхдан дурта. Энүнә тууҗлгч бәәдлнь сольгдсн уга, олн зүсн өңгтә хату девскр, панрмуд, сандлмуд углҗ тәвгдв. Тер мет цецгүд суулһгдад, кесг талвңгуд кеерүлгдв.
Б.Б.Городовиковин нертә Хальмг ик сурһулин һазак бәәдлнь Хальмгин Келн-улсин архивин герин шидрк ормнь бас ясгдв. «Родина» сойлын төвин болн Манҗин Аркадин нертә шаңһа филармоня талвңгуд бас оңдан бәәдл һарв. Темдглхәс, одахн тенд хальмг теегин хәәртә үрн, Хальмг Таңһчин Баатр Манҗин Аркадин бумблв секгдсн болдг. Эн хойр бәәрин ясврт нег өңгтә тосхлтын материал олзлгдад, хойр талвң нег кев-янз тогтав.
Элстин уульнцс болн хаалһс дара-дарандан ясгдад, мана балһсн өдр ирвәс улм сәәхрснь тер. Губаревичин нертә уульнцас авн А.Пюрбеевин нертә уульнц күртл велосипедәр йовдг шишлң хаалһ тосхгдв. Тер мет бичкдүдин төлә кесг талвңгуд бас секгдсн болдг.
Терүнәс нань Бурхн Багшин Алтн сүмин өөр велосипедмүд үлдәдг шишлң орм бас кегдв. Элст балһсна көлгнә цуг зогсалмуд хальмг келн-улсин янзар кегдв.
Онц темдглхд, нарт-делкән хургт белдәд, Элстин дорд үзгин уульнцст бәәдг олн давхрта гермүдин эрсмүд ке-сәәхн зургудар кеерүлгдв. Хаалһин хаҗуд бәәсн панрмудт бадм цецгин бәәдлтә шам кегдв, нег-үлү асхар теднь күн болһна нүд байрлулна.
Ю.Клыковин нертә уульнцд өдгә цагин «Хубилай Хан» гиичлүр, Элстин ар-дорд үзгт болхла шидр «ЗА» нертә гиичлүр секгдв. Келхәс, эн бәәрн зурһан сарин эргцд тосхгдв. Терүнәс хол биш 28-ч Әәрмин дәәчнрт тәвгдсн танкин ард өндртән 50 метр Әрәсән туг делснә, энүг зуни цагт углҗ тәвсмн.
Шар шаҗна хургт ирх олн гиичнр хамгин түрүнд Элстин аэропортд ирх, тегәд тенд ирлцңгү ясвр бас күцәгдв. Эрсмүдиг зурач Цонхлан Тимур хальмг кев-янзта зургудар сәәхрүлв. Тер мет билгтә эрдмч Пован Хаалһин кегдлмүд аэропортыг бас кеерүлв.
Элстин Пушкинә нертә уульнц давад балһсна төв темцәд йовхла, Чонкуша Петрин нертә билг-эрдмин колледжин оютнр мана теегин аң-аһрус, цецгүд зурад эргндкиг кеерүлсинь үзҗ болхмн. Балһсна талдан кесг ормст бас сән кец-таал тогтагдсинь темдглх кергтә.
Эндр асхн шар шаҗна нарт-делкән хург байрин бәәдлд секгдхмн. Хальмг Таңһч чидл өгчәдг һазр болна, теегин сувсн болҗадг ке-сәәхн мана Элст гиичнрән тосхд белн бәәхән дәкн нег иткүлх.

КАРСАНА Евгения