Зун наста Петр Леонтьевиг йөрәв

Һаха сарин 25-д Төрскән харсгч Алдр дәәнә ветеран, Б.Б.Городовиковин орденәр ачлгдсн, зун хавр тоссн Петр Леонтьевиг ончта өөнләнь йөрәлһнә керг-үүлдвр болв. Хальмг Таңһчин Толһач Хаска Бату, залврин ахлач Босхмҗин Гилән, залврин гешүд, зөв-йос харлһна бүрдәцсин һардачнр, таңһчин райодын толһачнр, олна болн баһчудын бүрдәцсин элчнр ик наста көгшәг йөрәв.
Хамгин түрүнд Хаска Бату Әрәсән Президент Владимир Путинә П.Леонтьевд илгәсн йөрәлин бичг умшҗ соңсулв. «100 нас наслсн күн хөвтә күн болҗ тоолгддг. Петр Леонтьевиг йөрәһәд, Төрскән харссн цуг ветеранмудт мет ик ханлтан өргҗәнәвидн. Тана кесн кергтн дорас өсч йовдг баһчудт эрк биш үлгүр болна», гиҗ бичгт келгдҗәнә.
– Петр Леонтьев 1958 җилд Хальмгт ирәд, энд иҗлдәд, эндр күртл олна хормад багтҗ бәәнә, Б.Б.Городовиковин дуудврар мана тал ирсн салдс болна. Олн җилмүдин туршарт эн тосхлтын халхар көдләд, мана таңһчиг шинәс босхлһнд ик тәвцән орулсн мөн. Эн җил бидн күндтә ветеранла хамдан Диилврин 80 җилин өөн темдглвидн. Алдр Диилвриг өөрдүлсн Петр Леонтьевичд нег һазра улсин нерн деерәс дәкнәс ик ханлтан өргҗәнәв. Цааранднь чигн эрүл-дорул олнд үлгүр болҗ бәәтн, – гиҗ Бату Сергеевич йөрәв.
Керг-үүлдврин йовудт Хаска Бату хальмгудас хамгин түрүн Советин Союзин Баатрин нер зүүсн Делгә Эрднин медаляр Петр Леонтьевиг ачлв. Тер мет гертән сән кец-таал тогтахин төлә күндтә ветеранд мөңгнә дем бәрүлҗ өгв.
Тер мет харһлтд ирсн улс Петр Леонтьевиг йөрәҗ, күндтә ветеранд цаһан хаалһ дурдв.
ОЛЬДАН Цаһан