Ах үйән күндлий!

Cән авъяст тохрсар хулһн сарин 1-д цуг нарт-делкәд медәтнрин Өдр темдглнә. Эн сән өдриг мана орн-нутгт 1992 җиләс авн темдглдг болв, эн өдр бидн мана аав-ээҗнрин ач-тус хәрүлҗ, белгән нерәдҗ, тедндән золһҗ однавидн. Әрәсән селән-балһсн болһнд медәтнрт нерәдгдсн керг-үүлдврмүд болна, күч-көлсч бүрдәцст хамдан көдлҗ йовсн ах үүрмүдән дуудҗ харһлтс бүрдәгднә.

Мана аав-ээҗнрин җирһлин хаалһ адрута бәәсмн, эдн баһ цагтан дәәнә болн тууврин күчр зовлң дааҗ һарсн, хөөннь таңһчин босхмҗд ик тәвцән орулсн улс болҗана. Күчр-күнд зовлңла харһсн бийнь ах үйин улс цаһан седклтә, седвәртә, төрскн һазр-усндан эңкр, өвкнриннь авъясан хадһлдг авг-бәрцтә болҗ баһчудт үлгүр-үзмҗ болна. Дорас өсч йовдг баһ үй аав-ээҗнртән килмҗән тусхаҗ, теднд сән таал тогтаҗ, эднә җирһл сән-сәәхн болхин төлә цугинь кех зөвтә гиҗ сангдна. Сүл цагт медәтнрин эрүл-менд харлһна, эднә җирһлин таал ясруллһна, эдн ут нас наслхин төлә ирлцңгү таал тогталһна төрмүдт мана орн-нутгт ик оньг өгдг болв. Тиигәд, «Ут болн күцәмҗтә бәәдл-җирһл» гидг келн-улсин төсвин йовудт аав-ээҗнр мөңгән олзта-тустаһар олзллһна халхар шин медрл хоршаҗ авхин, өдгә цага эв-арһс олзлдгиг дасхин төлә шишлң кичәлмүд бүрдәгднә. Медәтнр әмтнә социальн теткврин төвин медлд эрүл-мендин клубин, бииһин, билг-эрдмин негдлтст шунмһаһар орлцҗ, сул цаган сергмҗтәһәр болн тустаһар давулна. Эн җил Элстд таңһчин әмтнә социальн теткврин төв шин бәәрнд нүүҗ орв, тенд медәтнр эрүл-мендән батрулҗ, билг-эрдмән делгрүлнә. Таңһчин райодт үүлддг Әрәсән социальн саңгин әңгүдин улд медәтнр цуглрҗ харһхин төлә шишлң бүрдәцс секгдҗәнә. Энд медәтнр харһад, олн зүсн төрәр күүндвр тогтана, хамдан амрна.
Ах үйин улс ачта амрлһндан һарсн бийнь таңһчин олна бәәдл-җирһлд шунмһаһар орлцдгнь бахмҗта. Тиигәд, седвәртә, шулун-шудрмг медәтнр «Серебряные волонтеры» бүрдәцд орҗ, олна нүүрт йовхар шунна. Эднә үнн-чик хәләц, авг-бәрц баһчудт үлгүр болх зөвтә. Эн өдрмүдт мана таңһчд болсн шаҗна нарт-делкән ик хургт эврә сән дурар үүлддг ах үйин улс олн гиичнрт дөңгән күргҗ, керг-үүлдврмүд давуллһнд орлцв. Келхд, мана таңһчин бәәтхә, орн-нутгин кесг регионмудас медәтнр ирсн бәәнә. Эдн мана таңһчур ирсндән ик байрта бәәхән медүлв.
Маңһдур аав-ээҗнрән йөрәҗ, цуһар өрк-бүләрн цуглрҗ хамдан нәр-наадан кехмн. Мана ах үйин улс сән Өдрән байртаһар темдглҗ, эрүл-менд бәәҗ, ачнр-зеенртән нүдн-амн болҗ йовхиг дурдҗанавидн.
ДООҖАН Наталья