Залһлдана халхд ик тәвцән орулсмн

Одахн Элстд поштын һоллгч әңгин герин эрс деер таңһчин залһлдана халхин делгрлтд ик тәвцән орулсн Хальмгин улсин эдл-ахун ачта көдләч Бембин Александрт санлын самбр секгдв.

Хальмг Таңһчин залврин Ахлачин дарук – то-дигин делгрлтин министр Этән Алексей, «Ростелеком» ПАО-н хальмг әңгин һардач Харкөвүнә Ольга, ЮФО-н РТРС-ин һардачин элчин селвгч Манҗин Ишлә, залһлдана ветеранмуд болн Бембин Александрин элгн-садн болн үүрмүднь эн керг-үүлдврт орлцв.
1976 җилд Александр Эрдниевич радиозалһлдана 1-ч тойгта әңгин инженерәр күч-көлснә хаалһан экләд «Ростелеком» ОАО-н 6-ч тойгта ТУСМ-ин һардачд күрв. Кесг җилдән Элстин электрозалһлдана төв бүрдәциг чигн һардҗ йовла. Темдглхәс, Бембин Александр мана таңһчд Интернетин волоконн-оптическ түрүн сурвлҗ тосхлһнд орлцсмн. Олн җилдән үнн-чик седклтәһәр көдлсн төләдән Хальмгин улсин эдл-ахун ачта көдләчин болн «Залһлдана эрдмчин» өөдән нерн энүнд зүүлһгдв.
– Бембин Александр ямаран ик көдлмш күцәснь эндр бидн ил үзҗәнәвидн. Өдгә цагт олзлдг залһлдана кесг эв-арһс тиигхд уга билә, зуг Александр Эрдниевич медрлән болн дамшлтан олзлад, көдлмшән чинртәһәр тогтаҗ чадв. Эндр болхла залһлдан угаһар бидн бәәҗ чадхшвидн, тегәд тиим улсин нилчәр мана таңһчд залһлдан делгрҗ йовсмн гиҗ темдглх кергтә. Дорас өсч йовдг баһчудын нерн деерәс эн һардачд ик ханлтан өргҗәнәвидн. Бембин Александрин нериг олн-әмтн, нег үлү баһчуд медтхә гиһәд, эн санлын самбр секчәнәвидн, гиҗ Этән Алексей онц темдглв.
Тер мет үүрмүднь бүлән үгән келҗ, олн җилдән көдлҗ йовсн җилмүдин йовдлмудыг тодлҗ, Александр Эрдниевичин ик тәвцинь үнлсн болдг.

ОЛЬДАН Цаһан