Бурхн Багшин туск тодлвр

Иим нертә һәәхүл Н. Пальмовин нертә Келн-улсин музейд секгдв. Энткгин нертә зурач Васудео Каматха эврәннь үүдәврмүдән Элстд авч ирҗ үзүлҗәнә. Соньн эн һәәхүлин үүдәврмүд бурхн-шаҗна үүлдәчнрин нарт-делкән ик хургт босхгдсн төрмүдлә ирлцҗ, хәләһәчнрин оньг авлҗана.

Энткгин зурачин һәәхүлд 30 зург үзүлгдҗәнә. Бурхн Багшин җирһлиг болн үүлдвриг зурач үзүлхәр шунснь эн зургуд медүлҗәнә. Саяд улсин җирһлд тусан күргҗәдг номин ул тәвсн Күңкл Багшин ик ач-тусинь зурлһна эрдмин дөңгәр медүлхәр зурач үүлдврән нерәдсмн.
Васудео Каматх – билгәрн нер һарсн зурач мөн. Эврәннь эрдмдән ик өөдмд күрсн зурач цагиг болн күмни җирһлд нилчән күргсн Алдр Багшин дүриг болн цецн үүлдвриг гүн кевәр медүлхәр зүтксинь таңһчин әмтн үзҗ чадҗана.
Зурач 1956 җилд Карнатака штатд һарсмн. Бичкнәсн авн көвүн юм зурдг билә. Мумбаи ик балһснд өсч-боссмн. Джек Джей билгт толһалҗасн олн дунд тоомсрта зурлһна сурһулиг йилһән сәәнәр төгсәһәд, мөрә авсн болдг. Тиигәд Васудео Каматх зурачнрин зергләнд орад, өвәрц билгәрн йилһрсмн. Зурачин зургуд олн һәәхүлд үзүлгдҗ, хәләһәчнрт тодлгдсмн. Энткгин музеймүдин көрңд болн онц улсин хураңһуд зурачин үүдәврмүд хадһлгдҗана. Һазадын орна музеймүд болн билг-эрдмд дурта улс эн зурачин үүдәврмүдиг дурлҗ хулдҗ авна.
Васудео Каматх тууҗин төрмүдт нерәдсн үүдәврмүд бичсн деерән тууль-түүксин ул деер үүдсн зургудыг баһ бишәр зурна. Зург болһн гүн ухан-тоолврарн йилһрнә. Зурлһна эрдмнь чигн даңгин өөдән үнлгднә.
Зурач Васудео Каматх Бомбейск билг-эрдмин Ниицәнә президент болҗ үүлднә. Энткгин сойлын болн оюни җирһлд шунҗ орлцна. Әмтнә зургудыг тер дарунь зурдг эрдмән Каматх хайлго бәәхнь үүрмүд зурачнртнь соньн болҗ медгднә.
«Рамаяна» гидг нертәһәр зургдсн 28 зургнь Делид болсн ик һәәхүлд одахн үзүлгдлә. Бичкндән эцкиннь герин эрст төмр хаалһар гүүҗ йовх поездмүд зурҗасн көвүнә поезд энүнә үүдәврмүдиг Элстд күргҗ ирв.
Энткгин зурач Васудео Каматхин һәәхүл Хальмг Таңһчд түрүн болҗ үзүлгдҗәнә. Бурхн Багшин номин әмтиг негдүлдг дәкн нег халхинь билг-эрдм болҗахинь Энткгин зурачин һәәхүл болҗана. Хойр миңһн җил хооран Энткгин һазрт төрсн ном цуг делкәһәр тарсмн. Шин миңһн җилд Энткгин һазрин билгтә зурачнрин үүдәврмүд талдан һазрт күрч, әмтнә оньг авлҗ йовна.

ХӨӨЧИН Галина