Багшнриг магтҗ йөрәв

Урҗ өдр Хальмгин залврин герт багшнрин сән Өдр угтад, байрин хург болв. Таңһчин Улсин Хуралын (Парламентин) ахлач Артем Михайлов, залврин ахлач Босхмҗин Гилән, энүнә дарук, то-дигин делгрлтин министр Этән Алексей, федеральн ах инспектор Александр Беляев, сурһуль-эрдмин болн номин министрин үүл дааҗадг Александр Ким, Луганск Улсин Республикәс ирсн гиичнр, сурһуль-эрдмин ветеранмуд болн багшнр керг-үүлдврт орлцв.
Мана орн-нутгт дунд профессиональн сурһуль бүрдәгдәд, эн җил дигтә 85 җил болв. Босхмҗин Гилән келсн үгдән эн өөн темдгләд, цуг багшнриг болн сурһмҗлачнриг йөрәв.
– Сүл җилмүдт СПО-н бүрдәцст орҗ сурдг оютнрин то өсәд йовна, эннь сән йовдл тер юңгад гихлә көдлмшч эрдмтә мергҗлтнр кезә чигн кергтә болна. Терүнәс нань одахн Бурятин Республикд болсн төрскн келнә Цугәрәсән багшнрин марһанд Элстин 20-ч тойгта бичкдүдин садын хальмг келнә багш Настан Виктория ончрад, нег һазра улсин төлә байр-бахмҗ үүдәв. Багшнр көдлмшән сән кевәр бүрдәхин төлә мана таңһчд цуг таал тогтагдҗана. Ирх җилд бичкдүдин садмудт өдгә цагин таал тогтахин туст нег җува арслң йилххәр зуралгдҗана, тер мет дунд 27 сурһульд бат ясвр күцәгдхмн. Багшнр дорас өсч үйнрт йоста үлгүр болҗ, седклән тәвҗ, сурһульчнртан гүн медрл өгнә. Сурһульч болһна күцәмҗ эк-эцкнрин болн багшин тәвц болна, – гиҗ темдгләд, Гилән Герасимовна багшнрт цаһан хаалһ дурдв.
Тогтсн авъясар байрин йовудт сурһуль-эрдмин ветеранмуд болн эндр көдлҗәдг багшнр темдглгдв. Элстин лицейин эсвин багш Елена Волковад Советин Союзин Баатр Б.Б.Городовиковин Орден зүүлһгдв. Әрәсән Федерацин өөдән чинртә ачта багшин нер Цаһан Амна гимназин багш Лиджана Натальяд болн Лагань балһсна Очра Лиҗ-Һәрән нертә 3-ч тойгта дунд сурһулин багш Гайни Сараевад өггдв. Тер мет хөрн һар күн Хальмгин ачта багшин нер зүүв. Терүнәс нань Хальмг Таңһчин Толһачин мөрәһәр, олн зүсн Күндллһнә һашгудар болн Ханлтын бичгүдәр нег һазра багшнр темдглгдсн болдг. Дунд профессиональн сурһулин 85 өөнлә ирлцҗ, таңһчин колледжмүдт сурһулян йилһән сәәнәр сурдг 17 оютн Хальмгин Толһачин мөрәһәр ачлгдв.
Байрин хургин йовудт Элстин дунд сурһульмудын сурһульчнр болн таңһчин нертә артистнр олна йөрәлин үгд багтҗ, билг-эрдмән багшнрт нерәдв.
КАРСАНА Евгения