Селәнә эдл-ахун шишлң техникәр теткхәр

Шидр Әрәсән сенатор Хачирә Борис Хальмгин селәнә эдл-ахун министр Гаван Тимурла хамдан Санкт-Петербург балһсна тракторн заводт одв.
Мана орн-нутгт селәнә эдл-ахун шишлң техник кеҗ һарһдг эн бүрдәц нүүрләчнрин тоод орна. Сүл җилмүдт Хальмгт селәнә эдл-ахун бүрдәцст шин техник болн ирлцңгү мергҗлтнр керглгдҗәнә. Заводын һардврла харһсн кемд АПК-н халхар сурчадг нег һазра оютнриг нааран илгәхин туст күүндвр һарв.
Тер мет таңһчин фермермүдиг шишлң техникәр теткхин төлә шаңһа дем кергтә болҗана. Харһлтын ашар Хачирә Борис «Петербургский тракторный завод» АО-н һардач Сергей Серебряковд нөкцлтин халхар дөң-нөкд болснд Ханлтын бичг бәрүлҗ өгв (зургт).
Тодлхд, урднь 2023 җилин чилгчәр Элстд Минск тракторн заводын әңг секгдсн билә. Тер җилин хаврар Хальмг Таңһчин Толһач Хаска Бату Беларусь Республикин президент Александр Лукашенкола харһад күүндснә йовудт нөкцлтхәр үгцсн билә. Тер мет селәнә эдл-ахун төр бас хаһлгдв. Хөөннь мөчн сард Хаска Бату болн «Минск тракторн завод» ОАО-н һардач Виталий Вовк нөкцлтин бооца батлв. Манад нертә заводын дилерск төв секлһн Хальмгин болн Беларусин хоорндк залһлдаг улм батрулв. Терүнәс нань таңһчин селәнә эдл-ахун халх делгрүллһнд эннь туста болв.
Мана таңһчд җил болһн «Беларус» тамһта 60 трактор хулдҗ авдг билә, тер юңгад гихлә урднь шишлң Төв үүлдҗәсн уга билә. Ода болхла селәнә эдл-ахун көдләчнр, арһлачнр дор ормдан эврә таңһчдан, трактормуд болн шишлң техник хулдҗ авдг болв.
Эндр мана таңһчин селәнә эдл-ахун көдләчнрин эдлврт «Беларус» тамһта кесг миңһн трактор, тер тоод кесг зун шаху нань чигн шин техник бәәнә гиҗ темдглх кергтә. Техникин паркиг шинрүлхин төлә җил болһн 400 трактор хулдҗ авх кергтә болҗана. Эннь темснә, боднцгин, тутрһин, буудян сән урһц хуралһнд кергтә болна. Тер мет мал өсклһнә халхар хот белдлһнд бас керглгднә.
Темдглхәс, селәнә эдл-ахун шишлң техник хулдҗ авхин төлә кесг эв-арһс үүлдҗәнә. Эврә мөңгәр авсн деерән тер мет кредитин бүрдәцәр дамҗадчигн бас хулдҗ авч болна. Өдгә цагт белорусск көтлврмүдәр ирлцҗ көдлдг компаньсин тоод «Росагролизинг», «Сберлизинг» болн «Газпромлизинг» орна. Терүнәс нань «Россельхозбанк» болн «Сбербанк» селәнә эдл-ахун Министерствин халхар кредитин мөңг бас һарһҗ өгнә.
МТЗ заводын әңг секгдәд, көдлмшин шин ормс бүрдәгдсинь бас темдглх кергтә. Таңһчин һардвр болхла селәнә эдл-ахун халхд тәвцән орулҗадг көдләчнрт урдк кевәрн онц оньган өгч, кергинь урмдулхин төлә демин мөңг цааранднь йилһҗ өгчәнә.

КАРСАНА Евгения