«Үрс Сар» ансамбль – Түрг нутгт

«Yрс Сар» гидг хальмг улсин бииһин ансамбль Түрг орн-нутгт одад ик сойлын наадмд орлцв. Түргин Серик балһсна мэр Мехмет Хабали кесн харһлтын йовудт Хальмгин коллективлә улсин хоорндк сойлын залһлдаг батллһна төр оньгт авгдв. Хамцу төсвс күцәлһнә тускар чигн үг һарв.
Мехмет Хабалид иньгллтин болн күндллһнә темдг гиҗ хальмгин йосар белгүд бәрүлҗ өггдв.
Хальмг улсин билг-эрдм талдан келн-улсин оньг эзлҗ йовхинь эн йовдл медүлҗәнә. Улсин хоорндк сойлын залһлдан батрҗ йовх нөкцлтиг герчлҗәнә. «Yрс Сар» ансамбль арвн җилин туршт үүлдҗәнә. Коллективиг Хальмг Таңһчин сойлын ачта көдләч Убуш Андрюшкеев болн энүнә аваль Долорес толһална. Ансамбль олн ик наадмд орлцҗ, хальмг бииһин эрдмлә кесг һазрин әмтиг таньлдулҗана.

УШКАНА Сувсн