Селәнә сойлыг делгрүлхин төлә

Сойлын көдләчнр кеҗәдг көдлмш олн халхта. Ямаран чигн керг-үүлдвр эднә орлцлһн уга болхш. Улсин сойлын зөөр хадһллһнд, билг-эрдм делгрүллһнд, әмтнә сергмҗтә амрлһиг бүрдәлһнд эдн даңгин нүүрт йовна. Сойлын көдләчнрин туст килмҗ һарһад, земск багшин, земск эмчин көтлврмүдлә ирлцҗ сойлын земск көдләчин туст бас көтлвр батлҗ авгдсмн.
Хальмг Таңһчд эн керг-үүлдвр күцәгдҗәнә. Таңһчин райодар сойлын земск нәәмн көдләч экләд көдлҗәнә.
«Сойлын земск көдләч» гидг көтлврин түрүн аш диглгдснә хөөн тер көдләчнр райодар йовулгдв. Шишлң комиссь орҗ ирсн эрлһсиг шиңҗләд, шүүвр кеснә хөөн нәәмн күн йилһҗ авгдв. Шүүвриг давҗ һарсн тер нәәмн күн болһн нег сай арслңга дем авсмн. Селән һазрт көдлх режиссермүд, хореографмуд, балетмейстермүд, дегтрин саңгин көдләчнр селәнә сойлын гермүдт болн бичкдүдин көгҗмин болн билг-эрдмин сурһульд көдлхмн. Тиигәд эрдмин халхар сән белдвртә, баһ наста мергҗлтнр селәнә сойлын көдләчнрин тоод орв.
Баһ наста мергҗлтнр тавн җилдән көдлхин туст күч-көлснә бооца батлв. Әрәсән Президент Владимир Путинә седвәрәр эн көтлвр эклҗ күцәгдҗәнә. «Земск эмч» болн «Земск багш» гидг көтлврмүд күцәмҗтә болсн учрар ода сойлын көдләчнриг селән һазрт батллһнд бас ик оньг өггдҗәнә.
Таңһчин райодар сойлын җирһлиг делгрүлх күслтәһәр эн керг-үүлдвр күцәгдҗәнә. Йосна халхас өггдҗәх иим килмҗ сойлын кергт туслхнь маһд уга.
Хальмг Таңһчин Толһач Хаска Бату эн седвәриг дөңнәд, иргчдән сойлын земск көдләчнрин то икдүлх седклән медүлв. Таңһчин селәдәр медрлтә болн белдвртә мергҗлтнр көдлхд цуг халхарнь дөң болхар бәәхнь урмд өгчәнә.
Сойлын көдләчнр билгтә бичкдүдиг өсклһнд, теднә билг-эрдминь цуг халхарнь делгрүллһнд тусан күргхмн. Эврәннь көдлмштән седкл-ухаһан өгәд, өдр болһн сурһмҗин болн белдврин ик көдлмш кеҗ, сойлын делгрлтд тәвцән орулҗадг әмтнд цуг халхин килмҗ тусхагдх зөвтә.