Үүрмүднь санлынь тевчнә

Полицин подполковник Номһна Мергнә санлд нерәдгдсн футболын марһан сән авъяст тохрҗ, арвн җилин туршарт давулгдҗана. Эн дотр-дундын кергүдин бүрдәцд хөрн тавн җилдән көдләд, Госавтоинспекцд церглҗ йовсмн. Хаалһин җисәнә харулын йирин инспектор болҗ күч-көлснә хаалһан экләд, батальона командир болҗ ик даавртаһар кергән күцәҗ үүрмүд дундан ик күндллһ олсмн.

Шидр Элст балһснд «Юность» стадионд болсн дарани марһанд нәәмн команд орлцв. Мергн Анджиевичин элгн-саднь, Приозерн (ода Көтчнрә) района Чкаловск дунд сурһульд хамдан сурч болн дотр-дундын кергүдин бүрдәцст көдлҗ йовсн үүрмүднь энүнә санл тевчәд, цаһан седклтә, элгсг, чадмг, ик дааврта күн бәәсиг тодлв. Хамдан церглҗ йовсн үүрмүдиннь келсәр, көдлмштән чаңһ неквртә, үнн-чик хәләцтә, көдләч болһнд килмҗән тусхаҗ, төрмүдтнь орлцҗ, дөң-тусан күргҗ, олн зүсн марһас, олна керг-үүлдврмүд бүрдәдг бәәсмн. Дотр-дундын кергүдин бүрдәцст көдлмш амр биш, зәрмдән амрлһна өдрмүдт чигн кергән күцәх кергтә болна, тегәд спортар соньмсад, эрк биш цогц-махмудан батрулх кергтә. Полицин көдләчнрин футболын команд таңһчд болн орн-нутгт бәәтхә, һазадын орн-нутгудт болдг марһаст орлцдг бәәсиг эдн тодлҗ, Мергн Анджиевичин нилчәр эдн нер һарч йовсиг тодлв. Көдлмшин хөөн үүрмүдән дахулад заһс бәрҗ, аңһучлад, цугтаһинь хамцулдг бәәсиг эдн бас келв.
- 1995 җилд күч-көлснә хаалһан эклхдм Мергн Анджиевич хаалһин харулын цергллтд көдлҗәлә, тегәд эн нанд дөң-тусан күргҗ, медсән-чадсан зааҗ өгсмн. Хөөннь бидн хамдан церглҗ, таңһчин хаалһст әәмшг уга бәәдл тетклһнә, зеткртә йовдлмудас гетллһнә керг күцәҗ йовлавидн. Эн дигтә-дарата, көдлмштән ик дааврта, ямаран чигн төриг дарунь хаһлдг, чаңһ неквртә, келсн үгдән итклтә күн билә. Иим улс ода ховр. Мана үүрин санлд нерәдгдсн марһанд бидн орлцҗ, терүг бүрдәлһнд дөң болнавидн. Иим марһас эндрк баһчудт эрк биш кергтә, эдн ах үүрмүдин санл тевчҗ, эднә үлгүрәр үнн кевәр церглх зөвтә, - гиҗ Хальмг Таңһчин МВД-н Госавтоинспекцин һардачин үүл дааҗадг Галимджан Нурнахамбетов келв.
Номһна өрк-бүл өнр-өсклң бәәсмн, Мергн деерән тавн эгчтә отхн үрнь билә. Күүкд дунд ор һанцарн өссн бийнь эн йоста залу болҗ, эгчнртән итклтә нөкд - түшг болҗ, олн зеенртән нүдн-амн болад, йовсмн. Эгчнь Валентина Анджаевна өрк-бүлиннь нерн деерәс марһанд орлцсн үүрмүдтнь дүүһиннь санл тевчҗ цуглрснд ик ханлтан өргв.
Дотр-дундын кергүдин бүрдәцсин, Госавтоинспекцин командс дунд Мергн Анджиевичин үүрмүдиннь болн зеенриннь командс бас зөвтә орман эзлв. Марһан зөвәр зүткәтә болв, команд болһн диилвр бәрхәр шунв. Аштнь Элст балһсар үүлддг Әрәсән УМВД-н ДПС-ин онц взвод диилвр бәрәд, Номһна Мергнә нертә кубокар болн алтн медаляр ачлгдв. Хальмг Таңһчин МВД-н Госавтоинспекцин заллтын команд 2-ч орм эзлв, Әрәсән дотр-дундын кергүдин министерствин «Приютна» гидг райод хоорндк әңгин команд күрл мөңгн медаль авв. Зарһчнрин шиидврәр Болдра Санл сән гисн дәврәч, Цеднә Анатолий сән гисн харсач, Игорь Зайцев сән гисн үүднә харсач, Степана Бадм сән гисн полузащитник болн Утан Артем сән гисн наадач болад, онц темдгәр ачлгдв. Номһна Мергнә өрк-бүлнь марһанд ончрсн улст ачлврмуднь бәрүлҗ өгв.

ДООҖАН Наталья
ЗУРГТ: марһанд орлцачнр Номһна Мергнә элгн-саднла