Сурһмҗлгчнрин кергиг делгрүлхәр

«Әрәсә-эв-арһин нутг» гидг шаңһа төсв күцәлһнә йовудт «Сурһуль- эрдмин нүүрләчнр» нертә төсв давулгдҗана. Баһчудын кергүдәр бәәдг шаңһа Агентствин дөң-нөкдәр «Баһчуд болн бичкдүд»гидг келн-улсин төсв бас күцәгдҗәхиг онц темдглхмн. Өдгә цагт ирлцңгү төсвин йовудт «Сурһмҗлгчнр» нертә марһанд хамцу седвәр татлһна девсң эклв.Хальмг Таңһчин улс болхла үкр сарин 4 күртл эн керг-үүлдврт орлцҗ чадхмн.

«Cурһуль-эрдмин нүүрләчнр» төсвлә ирлцәд сурһмҗлгчнрин сойл делгрәд, багшнрт, һардачнрт болн оютнрт дашлтарн хувалцхд,аш сүүлднь күч-көлсч хаалһан эклҗәдг мергҗлтнриг дөңнх таал учрх болв. Эн төсвд орлцачнрт нег күслтә, нег даалһвр күцәҗәдг хамдан көдлҗәдг үүрмүднь,шинҗләчнр нөкд болҗ, сурһмҗлгчнрин көдлмшин чинринь өөдлүлхмн. Насни дигт күрсн оютнр,багшнр болн сурһуль-эрдмин, сойлын, спортын болн баһчудын кергүдәр үүлдҗәдг һардачнр эн төсв күцәлһнә кергт бас орлцҗ чадҗана гиҗ темдглх кергтә.
- Сурһмҗлгчнрин дөңгәр сурһуль- эрдмин халх цаарандан делгрәд бәәхмн. Арвн дөрвн миңһн мергҗлт болн оютн ирлцңгү кергт дегц орлцхла, хамгин сән дамшлт тархалһна таал учрхнь лавта. Нег үлү төсвлә ирлцәд заагдсн кергиг завср угаһар күцәҗ болҗана,сән дамшлтыг үйәс үйд күргҗ медүлхмн. Минь иим чинртә залһлдаһар дамҗад, орн-нутгт сурһуль-эрдмин халхиг шинрүлҗ болхмн, - гиҗ «Әрәсә-эв-арһин нутг» гидг шаңһа төсвин һардач Андрей Бегин тоолҗана.
Ода деерән Хальмг Таңһчас арвн зурһан күн ирлцңгү марһанд орлцх седвәр татв. Эн девсң «Машук» медрлин Төвин сурһуляс экләд, цааранднь ниигмәнә сүлҗәнд ирлцңгү медрл заагдх болв. Төсвд орлцачнр дамшлтын халхар хамцу даалһврмуд күцәх, сурһмҗлгчнрин керг-үүлдврин тускар ниигмәнә сүлҗәнд зәңглх, харһлтс бүрдәһәд, сурһмҗлгчта хамдан театрт хәләсн наадна эс гиҗ умшсн дегтрин тускар күүндвр тогтах зөвтә. Аштнь болхла сурһуль-эрдмин халхар сурһмҗлгчнрин кергиг цааранднь делгрүллһнә туст седвәр татхмн, эннь дунд сурһулин, ик сурһулин, нам бүкл региона төлә чигн үлгүр-үзмҗ болх зөвтә. Хамгин сән орлцачнр «Машук» медрлин Төвд болх ашлгч керг-үүлдврт орлцхмн,энд эдн эврә төсвсән олнд медүлҗ, шаңһа шинҗләчнрлә таньлдҗ чадхмн.
Эн җил марһанд орлцачнр «Орн-нутг», «Медиа», «Сойл» болн «Сурһмҗлгчнр» зөрүллтсәр дөрлдх гиҗ зуралгдҗана. Сурһуль-эрдмин көтлврмүд болн дамшлтын кичәлмүд нег күслтә, нег санан-седклтә улсиг олҗ авад, ирлцңгү марһаст диилвр бәрхд туслхнь маһд уга.

Шагҗин Любовь