Һарсн өдрләнь йөрәв

Урҗ өдр Әрәсән Президент Владимир Путин 73 насан зүүв. Олна йөрәлин үгд Хальмг Таңһчин Толһач Хаска Бату багтв.
– Мана Президент Владимир Путин орн-нутгин босхмҗин, цецгәрлтин темдг болна. Әрәсән өдгә цагин тууҗ Владимир Владимировичин нернлә батар залһлдата. Делкәд мана Президент ик күндллһ болн тоомср олсн үүлдәч мөн. Орн-нутгин регионмудт, нег үлү мана таңһчин төрмүдт оньган өгснд ик ханлтта бәәнәв. Энүнә дөң-тусар Хальмгт усна төр экләд хаһлгдв. Терүнәс нань Владимир Путинә даалһсар шар шаҗна сурһальд болн шинҗллтд туслдг саң бүрдәгдв. Эндр Президентин һардврт орн-нутгт бәәдг олн келн-улс хоорндан ниитәһәр бәәҗ, Әрәсән цецгәрлтин болн олна кергин төлә тәвцән орулҗ йовна. Мана Президентд эрүл-менд болн цаһан хаалһ дурдҗанав, – гиҗ Хаска Бату онц темдглҗ йөрәлин үгән нерәдв.

ОЛЬДАН Цаһан