Хальмгин элчнрт – өөдән ачлврмуд

Шидр Краснодар балһснд болсн Өмн үзгин округин «Келн-улсин бахмҗ - 2025» нертә мөрән лауреатнрин нерд заагдв. Әрәсән келн-улсин Ассамблейин һардач, Әрәсән Баатр Александр Даркович керг-үүлдвриг секв. Орн-нутгин Хүүвд «Негдсн Әрәсә» партин әңгин һардач, Әрәсән келн-улсин Ассамблейин ахлач Владимир Васильевин нерн деерәс йөрәлин үг эн олнд соңсулв.

«Эн җилд түрүн болҗ Ассамблейин төсв шин девсңд һарад, нәәмн региона улсиг негдүлсинь темдглв. Гиичлүлгч Кубань түрүн болҗ гиичнрән тосчана. Тер тоод ах үйин болн баһ наста элчнр, олн эрдмтә, орн-нутгин келн-улсин хоорндк хәрлцәг негдүлдг, төрскнч седклтә улс нааран ирв. Әрәсәд бәәдг олн келн-улс хоорндан ниитәһәр бәәхнь тана көдлмшин тодрха ашнь болҗана», – гиҗ Владимир Абдуалиевичин илгәврт келгдв.
Краснодарск крайин һардврин дотр-дундын политикин департаментин һардачин дарук Вадим Кондратенко эн йовдлын бүрдәһәчнрт ханлтан өргв. Алдр Диилврин 80 җилин өөнлә ирлцҗ, шишлң мөрә үүдәгдснь чинртә болв, гиҗ Вадим Юрьевич темдглв.
Өөдән мөрәһәр ачлгдсн улсин дунд Хальмг Таңһчин элчнр заагдснь бахмҗта. Хальмгин Баатр, РСФСР-ин билг-эрдмин ачта үүлдәч, «Өөрднр» бииһин шаңһа театрин һардач Нәдвдә Петр Әрәсән келн-улсин сойлын делгрлтд болн хадһллһнд тәвцән орулсн төләдән мөрәлгдв, «Әрәсән келн-улсин хоорндк хәрлцәнә туст олзлсн йилһән сән дамшлт» гисн мөрәһәр таңһчин улсин эдл-ахун ачта көдләч, Хальмг Таңһчин күндтә иргн Ким Гелий ачлгдв. Ирлцңгү керг-үүлдврт орлцсн Ассамблейин Хальмгин әңгин ахлач Бембин Евгенийд эднә ачлврмудынь бәрүлҗ өгв.

КАРСАНА Евгения