АПК-н чинринь өөдлүлхәр

Эн өдрмүдт мана орн-нутгт Цугәрәсән агродиктант давулгдҗана. Әрәсән 89 регион керг-үүлдврт орлцҗана. Сурһульчнр, оютнр, олн бүрдәцсин мергҗлтнр, Төрскән харсгч Алдр дәәнә ветеранмуд, цергә шишлң керг-үүлдврт орлцачнр, нертә үүлдәчнр, ик-бичкн уга олн-әмтн шунмһаһар Агродиктант бичҗәнә.
Керг-үүлдврт орлцачнр АПК-төрәр 45 минутын туршарт 30 сурврт хәрү өгх зөвтә. Ут тоодан Әрәсәд йисн миңһн һар талвңд әмтн агродиктант бичҗәнә. Келхәс, орн-нутгин регионмудт эврә өвәрц талвңгуд бүрдәгдв. Үлгүрлхд, Москва балһснд К.А.Тимирязевин нертә селәнә эдл-ахун академьд болн агроэкологин халхар номин шинҗллт кедг «Экорганикс» нертә бүрдәцд агродиктант бичҗ болна. Москван мүҗин Истринск района Дубровское селәнд ээзгә кеҗ һарһдг цехд бас ирлцңгү талвң бүрдәгдсн болдг. Краснодарск крайд болхла П.Лукьяненкон нертә «Кубань» келн-улсин төвд әмтн диктант бичв. Тиим кевәр орн-нутгин талдан регионмудт соньн олн ормст Агродиктант давулгдҗана.
Урҗ өдр Элстин төвд Долан хонгин суврһна өөр Агродиктантын талвң бүрдәгдв. Темдглхәс, орн-нутгин дөрвн регион шуд эфирин йовудт орлцв. Тер тоод Москва, Аһш, Мурманск болн Хальмг Таңһч орснь темдгтә болв. Мана таңһчд селәнә эдл-ахун экономик тогталһна нег һоллгч әңгнь болдг. Кезәнәс авн мана өвкнр малын ард йовҗ, тәрәһән тәрҗ, өрк-бүлмүдән теҗәдг бәәсмн. Өдгә цагт болхла АПК-н халх цаарандан делгрәд йовна. Кесг җил дарандан нег һазра фермермүд буудян элвг урһц хураһад, орн-нутгин нүүрләчнрин тоод орна.
Элстин төвд көк теңгрин дор бүрдәгдсн талвңд таңһчин Улсин Хуралын (Парламентин) ахлач Артем Михайлов, Әрәсән сенатор Хачирә Борис, Төрскән харсгч Алдр дәәнә ветеран Петр Леонтьев, Әрәсән ачта агроном Борис Гольдварг, одахн Цугәрәсән марһанд ончрсн олн үртә Талтаевихнә өрк-бүл, цергә шишлң керг-үүлдврт орлцачнр болн талдан улс Агродиктант бичв. Тер өдр үдлә Москвад болсн «Алтн намр-2025» Цугәрәсән һәәхүлин йовудт бүрдәгдсн телетагтд Элст балһсн шуд эфирт һарв. Энүг сенатор Хачирә Борис давулв. Борис Бекмуратович Агродиктантд орлцачнрин тускар келҗ, өөрдҗәдг селәнә эдл-ахун көдләчнрин сән Өдрлә орн-нутгин улсиг йөрәв. Энүнә келсәр, Агродиктант давуллһн – селәнә эдл-ахун халхиг улм өөдән һарһҗ, энүнә чинринь темдглв. Мана таңһчд Агродиктантыг Көк теңгсин заһсчнр, хошмудтан бәәдг малчнр, «Хар Һазр» заповедникд көдлмштән бәәсн улс чигн бичҗәнә, гиҗ шуд эфирин йовудт эн темдглв.
Улсин Хуралын (Парламентин) ахлач Артем Михайловин келсәр, мана таңһчд Агродиктантд олн-әмтн орлцҗана. Дорас өсч йовдг баһчуд селәнә эдл-ахун көдлмшин чинриг медх, соньмсх зөвтә. АПК-н халх Хальмгин Толһач Хаска Батун онц бүртклһнд бәәнә. Тегәд эн туст цуг халхаснь сән дөң күргҗәдгнь дәкнәс темдглсн болдг.
– Мана орн-нутгин улс кезәнәс авн теегт урһцан хураһад, малан өскәд, ямр чигн көдлмшәс әәдго билә. Эндр лавкст орхла олн зүсн хот-хол хулдҗ авч болна. Тегәд өдгә цагин баһчуд ах үйин улсас эрк биш үлгүр авч, төрскн һазртан көдләд, олна кергин төлә тәвцән орулх зөвтә, – гиҗ ветеран Петр Леонтьев сүв-селвгән өгв.
Хальмг Таңһчд ут тоодан 60 шаху талвңд Агродиктант бичгдв. «Негдсн Әрәсә» партин «Әрәсән селән» нертә төсв күцәлһнә йовудт эн керг-үүлдвр бүрдәгдв.
КАРСАНА Евгения