Үнн алдртна шаҗна туск үүдәврмүдиг белглв

А. Амр-Санана нертә Келн-улсин дегтрин саңгд өдр болһн олн керг-үүлдврмүд давна. Тиим нег керг-үүлдвр шидр энд давв. Москван патриархатын дегтрин һарһачин дегтрмүдин презентац болв. Дегтр Һарһачин ах редактор, Балашихинск болн Орехово-Зуевск епископ Николай тер дегтрмүдиг умшачнрин оньгт тусхав.

Москван патриархатын дегтр һарһач Орс чонҗин йосна халх бәрмт цаасиг болн мөргүл келһнд олзлдг дегтрмүд барлҗ һарһна. Орс шаҗна литтә һарцс, шаҗна болн оюни төрт нерәдсн дегтрмүд, бичкдүдт нерәдсн һарцс күртл дегтрин һарһач барлна. Эн дегтр һарһач эврә барин һарцта, тернь «Журнал Московской Патриархии» гиҗ нерәдгднә.
Дегтрмүдин презентац кен-негән медлцлһнә бәәдлд давв. Епископин келсн тоотыг әмтн оньган өгч соңсв. Таңһчин райодас ирсн багшнр, дегтрин саңгин көдләчнр епископин келсн тоотд оньган өгәд, сурврмуд тәвәд, кергтә цәәлһвр авцхав. Соньн эн харһлтд Хальмг ик сурһулин номтнр болн оютнр, Чонкуша Петрин нертә билг-эрдмин колледжин оютнр, үнн алдртна шаҗна чонҗмудын цергләчнр, умшачнр орлцв.
Дегтр һарһачин ах редактор авч ирсн дегтрмүдиг диглҗ белдсн деерән, дегтр болһна тускар тохнята цәәлһвр өгв. СВО-д церглҗ йовх дәәчнрт дөң боллһар дегтр һарһач көдлмшин тускар чигн епископ Николай цуглрсн улст келҗ өгв. Умшачнрт ямаран дегтрмүд таасгдгарнь соньмсад, умшачнрин неквриг тоод авхин тускар ах редактор медүлв.
Алдр Диилврин найн җилин өөнд нерәдсн дегтрмүдт чигн ах редактор оньган тусхав. Москван болн Цугәрәсән Патриарх Кириллын «Родина. Вера. Победа» гидг дегтриг епископ Николай онц темдглв.
Москван патриархатын дегтр һарһачин һарцсин презентацд Элистин болн Хальмгин архиепископ Юстиниан, Москван митрополитин зертә-зевтә чидлмүдлә залһлда бәрдг әңгин ахлач, епископ Николайин нөкд протоиерей Марк Ермолаев, Хальмг Таңһчин сойлын болн зуульчллһна министрин дарук Санҗрга Герман, КРИПКРО-н ректор Мунчинә Лилия орлцв.
Москван патриархатын дегтр һарһачин дегтрмүдин туск зәңгллһн дегтрин саңгин сайтд олна оньгт тусхагдхмн. Келн-улсин дегтрин саңгин һардач Майя Безидеевад дегтрмүд бәрүлҗ өггдв. Дегтрин саңгудт немр дегтрмүд орҗ ирснь йириндән сән йовдл мөн. Эн үүлдвр болхла, Москван патриархатын дегтр һарһачла нөкцлтин залһда бәрҗ үүлдх таал өгчәнә.
Эн дегтр һарһачин тууҗ Москван Патриархиин седкүлин түрүн тойг 1931 җилд барас һарсн цагас авн эклнә. Эн редакцин ул деер 1946 җилд Москван патриархин дегтр барллһна әңг бүрдәгдсмн. Эн әңгин ул деер 1995 җилд дегтр һарһач бүрдәгдсн билә. Мөргүлд олзлгдҗадг номта бичкн дегтрмүд һарһҗадг төр дегтр һарһач өмнән тәвсн билә.
Дегтр барлҗ һарһлһна кергиг цааранднь делгрүлҗ, гегән-гегәрлтин көдлмш кеҗәдг төләднь епископ Николайд ханлтан медүләд, архиепископ Юстиниан «Явление Господа Иисуса Христа верующим Элисты» гидг бурхна зург болн «Җаңһр» хальмг баатрльг дуулвриг белглҗ өгв.
Иигәд Москван Патриархатын дегтр һарһачин дегтрмүд Хальмгин дегтрин саңд зөвтә орман эзлв.
ХӨӨЧИН Галина