Цагин некврлә ирлцәд

Шидр Ик Буурл районд байрта йовдл болв. Энд өдгә цага дегтрин саң секгдв. Дегтрин эн саңд цуг тоотнь шинәр, цагин йовудла ирлцүлҗ күцәгдсмн.

Цуг тоотнь шинрүлгдснә дару дегтрин саңд ирҗ дегтр авч умшҗ, амрлһна цаган давулхд, олн орлцата соньн керг-үүлдврт орлцхд таалта бәәрн болв. Шин техник энд углҗ тәвгдв. Дотрк кеерүлнь йир өвәрц болв. Энд бәәдг әмтнә тавн уңг-тохминь тодлулҗадг темдгүд тадн ямаран һазрт ирсиг медүлнә. «Өрк-бүл» гидг келн-улсин төсвин кемҗәнд дегтрин саң шинрүлгдв. Әрәсән Президент Владимир Путинә седвәрәр эн төсв бәәдл-жирһлд тохрагдҗана.
«Шинрүлгдҗ, үүдән сексн дегтрин саң таңһчд ода үүлдҗәдг өдгә цага зурһадгч дегтрин саң болҗана. Дөрвн җилин туршарт Хар Һазра, Лаганя, Сарпан болн Яшалтан райодт тиим шин дегтрин саңгуд эдлврт орулгдҗ, ода көдлҗәнә. Элст балһснд чигн шин дегтрин саң үүлдҗәнә. Ирх җилд модельн дәкн нег ирлцңгү дегтрин саң секгдхмн. Тернь Элстин А. Пушкинә нертә балһсна дегтрин саңгин улд үүлдхмн», – гиҗ Хальмг Таңһчин Толһач Хаска Бату эн үүлдвриг үнлҗәнә.
Района толһачнрт болн сойлын министерствд эн көдлмшиг цааранднь делгрүлх заавр Таңһчин Толһач өгв. «Өдгә дегтрин иим саңгуд цагин некврт ирлцәтә соньн болсн деерән баһчудыг үүлдвртән орлцудг сойлын бүрдәц болх зөвтә», – гиҗ Бату Сергеевич тоолвран медүлв.
Иигәд Хальмгт үүлдҗәдг шин үйин дегтрин саңгуд әмтн дунд тааслт олҗ, олн умшачнриг цуглулҗана.