Эцкин тоомср өсәд йовтха!

Өдгә цагт демографин политик өргҗүллһнд Әрәсән Президент Владимир Путин болн орн-нутгин залвр ик оньган өгчәнә. Тегәд чигн ода нилхд төрлһиг, олн үртә өрк-бүлмүдин тоог икдүллһнә кесг шин төсв күцәгдҗәнә.
Тер тоод 2021 җиләс авн хулһн сарин 19-д Әрәсәд Эцкин өдр темдглдг болв. Тер өдрин өмн өргнд таңһчин сурһульмудар, бүрдәцсәр кесг керг-үүлдвр болв. Элстд болхла хулһн сарин 18-д бичкдүдин үүдәлтин бәәшңгин өөрк бичкн талвңд «Эцкнрин сад» секгдв, тенд түрүн модд суулһгдв, тиим кевәр эн шин сад бас өрк-бүлиг батруллһнд, шин өрк-бүл бүрдәлһнд нилчән күргәд бәәхнь лавта.
Тиим кевәр бичкдүдин үүдәлтин бәәшңгин өөр «Эцкнрин сад» секгдәд, түүнә түрүн модд суулһлһна олна керг-үүлдвр болв. Тиим седвәриг «Негдсн Әрәсә» парть болн «Баһ наста гвардь» бүрдәцин волонтермуд татв.
Эн өдр олна бүрдәцсин үүлдәчнр, олн үртә эцкнр мел ноһарад бәәдг туя ке-сәәхн 10 модыг суулһв. Дивное селәнә урһа модд урһадг эдл-ахуһас терүг авч ирв. Тиим кевәр эн керг-үүлдврт Элст балһсна толһач Максим Сорокин, Әрәсән «Отцы России» гидг орн-нутгин олна бүрдәцин таңһчин әңгин ахлач Мучан Баатр, СВО-н ветеранмудын таңһчин бүрдәцин ахлач Чумуда Николай көвүдтәһән шин садын модд суулһв.
- Эцкин өдр Әрәсән Президентин зәрлгәр батлгдла. Эн сән өдрин өмн өргнд бидн туя мод суулһвидн. «Эцкнрин сад» эн болхмн. Энтн йир сән седвәр гиҗ санҗанав, – гиҗ сад секлһнә йовудт Мучан Баатр келв. - Нааран күүкдән дахулад олна үүлдәчнр ирсн йовдл намаг байрлулҗана. Суулһсн модан ирәд хәләһәд бәәхвидн. Эцкин тоомсринь өөдлүллһнд эн керг-үүлдвр церглҗәнә. Эцкнр эврәннь чинрән медҗ өрк-бүлән батруллһнд, күүкд өсклһнд улм ик тәвцән орулад бәәтхә гиҗ дурдҗанав. Теднәс күүкднь үлгүр авад бәәхнь лавта, – гиҗ Баатр Иванович тоолврарн хувалцв.
Эцкнр күүкдтән сән сурһмҗ өгч, улм шунлттаһар теднә кергүдт орлцҗ, олна керг-үүлдврт теднлә хамдан орлцҗ теднәс таңһчин сән иргнмүдиг өсктхә, гиҗ Олна палатын ахлач келв.
Эн мана күүндврт цааранднь СВО-н ветеранмудын таңһчин бүрдәцин ахлач Чумуда Николай орлцв. «Эндр бидн «Эцкнрин сад» секчәнәвидн, тернь сән, олнд туста, эцк күүнә нериг өөдлүлҗәдг керг-үүлдвр болҗана. Ода бидн өрк-бүлмүдт ик оньг өгчәх кемд эцкнрин нилчиг икдүлх зөвтәвидн, тиигхлә цуг өрк-бүлмүд ни-негн бәәҗ әмтнә то икдүллһнд тәвцән орулх.
Нег үлү баһчудын өрк-бүлмүдт эцкин чинринь өөдлүлхлә, эдн эврә даавран медҗ өрк-бүлән батрулад, күүкдтән сән сурһмҗ өгәд бәәхнь лавта. Би көвүтәһән хойр мод суулһв. Мана Элст балһснд кесг урһмл урһна, нег үлү ода мана бәәдг «Иньгллт» паркд, теднә тонь цааранднь чигн икдәд йовтха. «Эцкнрин сад» суулһад, бидн тер сән седклин кергиг күцәҗәнәвидн. Паркар күүкдлә йовҗ, цевр аһар киилҗ, сул цаган хамдан тустаһар давулҗ болҗана, улм ик то тиим талвңгуд Элстд бүрдәҗ болҗана. Тиигхлә өрк-бүлмүдин то чигн өсч тедниг батруллһна таал улм икәр үүдәд бәәх. Хотл мана балһсн чигн цаг ирвәс өргҗәд, делгрәд йовна. Иргчдән бичкдүдин болн өрк-бүлмүдин амрлһна, байрта-бахта җирһлин төлә улм сән таал тогтаҗ чадхвидн», – гиҗ Николай Санджи-Гаряевич товчлв.
- Бидн көвүтәһән бас эн керг-үүлдврт орлцҗанавидн, эцк күн күүкдтән үлгүр болх зөвтә, тиим туста керг күцәҗ, сад суулһҗ бидн, эцкнр, тиим үлгүр үзүлҗәнәвидн. Эцк күүнә нилчнь ик, түүнә дөңгиг күүкднь кезә чигн керглнә, терүг мартхмн биш, – гиҗ Элст балһсна толһач Максим Сорокин келв.
Хальмг Таңһчин Улсин Хуралын депутат, «Бат өрк-бүл» гидг төсвин региона зүүцүләч Мацга Татьяна бас тоолвран келв: «Эцкин чинринь олна ниигм сәәнәр медҗәнә, күүкдин сурһмҗд ик нилчән күргнә, теднә тәвцинь ода өргҗүләд бәәх кергтә. Эцк бәәхлә өрк-бүл чигн бат болх», – гиҗ депутат темдглв.
Цуг эцкнриг сән өдрләнь йөрәҗ, теднд бат эрүл-менд, амулң эдлҗ бәәтн гиҗ дурдв. «Эцкнрин сад» өрк-бүлиг батруллһнд дөң болҗ, олн үртә өрк-бүлин үлгүриг олн дунд тархаҗ, тиим кевәр бидн хальмг авъясар тохман, келн-улсин тооһан икдүлҗ өвкнрин заңшалыг күцәхвидн, гиҗ Татьяна Сергеевна заав.
Тиим кевәр өрк-бүлин, бичкдүдин тоог икдүллһнә орн-нутгин болн таңһчин даалһвр күцәлһн ода чинр зүүҗәнә, терүг бәәдл-җирһлд тохралһнд «Эцкнрин сад» болн нань чигн олна кергүд нилчән күргәд бәәхнь лавта.

ҖААХАН Бадм