Медальмүдәр ачллһна керг-үүлдвр болв

Хулһн сарин 17-д, Элстд, Николай Пальмовин нертә Келн-улсин музейд СВО-д орлцҗадг баатрмудын эцкнрт «Салдсин эцк» гидг медаль бәрүлҗ өглһнә күндллһнә керг-үүлдвр болв. Энүг нүр үгәр таңһчин Олна палатын ахлач Мучан Баатр секв. «Олна тоомсрин «Салдсин эцк» гидг медаль «Әрәсән эцкнр» гидг Цугәрәсән олна җисәнә ачлвр болҗана. Тиим ачлвриг бәрүлҗ өглһн Әрәсән залврин керг-үүлдврин 2024-2026 җилин көтлврт орулгдла», – гиҗ Баатр Иванович темдглв.
Дәкәд дөрвн көвүтә эцк Васкән Николайд «Салдсин эцк» гидг медалиг өрчднь зүүлһв. Николай Сергеевичин ууһн Савр көвүнь СВО-д цергә даалһвран күцәҗ йовад әмнәсн хаһцла. Отхн көвүнь Баатр бас СВО-н ветеран, цергә керг-үүлдврин йовудт шавтгдла. Наадк хойр көвүнь бас талдан цергә керг-үүлдврин ветеранмуд болҗана. Николай Сергеевич эврән кесг җилдән механизаторар көдлҗәлә, таңһчин түрүн комсомолын-баһчудын мал өсклһнә бригадмудын негинь толһалҗ йовла. «Көвүм эврә дурар СВО-д одла, тиим сурһмҗ бидн өрк-бүлдән өгләвидн, эврән чигн тиим шунлтта, уралһ көвүн билә. Һурвдгч көвүм бас Чечня дамҗад цергә керг-үүлдврт одла, тенд шавтла. Хойрдгч көвүм Магаданд бәәнә, полковникин цолта. Дөрвдгчнь Дагестанд цергллә, ода полицд көдлҗәнә», – гиҗ өрк-бүлиннь тускар Николай Сергеевич келҗ өгв.
Цааранднь олна күндтә «Салдсин эцк» ачлвриг Василий Дьяченкод бәрүлҗ өгв. Энүнә Роман көвүнь Чечняд, Сирийд, СВО-д болсн кесг дәәлдәнд орлцсмн, «Залу-зөргин төлә», «Дәәнә үүлдврт орлцач», «Даалһвр болн сән нерн», «Кавказд церглснә төлә» гидг темдгәр ачлгдла. Зөргтәһәр дәәч кергән күцәҗәсн Роман Васильевич көвүнь 2025 җилин мөчн сард әмнәсн хаһцв. «Тернь мана өрк-бүлин төлә ик һару болв. Баһ настадан тиигҗ Төрскнә сулдхврин болн үлмә уга бәәлһнә төлә әмән өгсмн. Ода би түүнә үүрмүдт, түүнлә әдл наста баһчудт чадсарн дөң болҗанав», – гиҗ Василий Григорьевич келв. Баатрин эцк ода ачта амрлһнд бәәнә, СВО-н дәәчнрин төлә буйнч дөң күргдг кергт шунмһаһар орлцна.
Дарунь олна күндтә ачлврар зөргтә баатрин эцк Эрнҗәнә Сергей ачлгдв. Көвүнь баһ сержант Владимир Сергеевич Луганск Улсин Республикин болн Запорожск мүҗин һазрт залу-зөргтәһәр дәәлдҗ йовад әмнәсн хаһцв. Баатр йовдл һарһсндан Залу-зөргин орденәр ачлгдв. Ачлвр зүүлһнә керг-үүлдврт экнь Галина Бадмаевна күүкн, көвүн хойртаһан ирв.
Баатрин күүкнь теднә сурһульд болсн олна керг-үүлдврт ирәд, тенд бүрдәсн һәәхүлин нег зургт эцкән үзәд таньв. Ода Келн-улсин музейд бас тиим зург бәәнә. «Тиим ачлвр йир ик чинртә, дәәлдәнә һазрт үлдсн баһ наста көвүдин ачлврнь тернь бас болҗана», – гиҗ Сергей Анатольвич келв. Ода баатрин эцк төрскн Чолун Хамр селәнә бәәдл-җирһлд орлцҗ, терүнә бәәдлиг кеерүллһнд болн ясруллһнд орлцҗана.
Баһ наста мергҗлтнрин сурһмҗлач болҗ үүлдҗәлә. Галина Бадмаевна авальтаһан хамдан һурвн үрән өсклә, ода 6 ач-зееһән хәләҗ таалҗана.
Ачлвр бәрүлҗ өглһнә өмн музейин көдләчнр Төрскән харсгч Алдр дәәнә тууҗин, түүнд 110-ч тойгт мөртә Хальмг дивизин дәәчнр залу-зөргтәһәр орлцҗасна, партизанмудын җисән Хальмг Таңһчд делгрҗәснә, таңһчин йирин иргнмүд болхла дәәнә цагт Кизляр-Әәдрхн төмр хаалһ тосхҗасна тускар залын аһуд болсн ахр экскурсин йовудт келҗ өгв. Тер төмр хаалһ Сталинградын дәәлдәнд диилвр бәрлһнә төлә ик чинр зүүснә тускар бас келгдв.
Түүнә хөөн керг-үүлдврт орлцачнр Хальмг 110-ч дивизин командир Василий Хомутниковин бумбд ирәд цецгүд тәвв. Тиигҗ СВО-н баатрмудын болн Төрскән харсгч Алдр дәәнд орлцсн дәәчнрин залу-зөргтә үүлдвр хоорндан батар залһлдата бәәсинь мана тууҗ үзүлҗәнә, теднә 80 җил хооран делдсн Алдр Диилвр болн СВО-н йовудт һарһсн баатр кесг йовдлнь олн улсин санлд мөңкрәд үлдх, эндрк болн иргч үйнр теднә күцәсн зөргтә кергинь мартшго.
ТҮРВӘН Һуна