Тааста эрдмнь бахмҗта

Күн болһнд баһ цагтан чик шиидвр авч, тааста эрдм шүүҗ авх кергтә болна. Овадыка Инна бичкнәсн авн юрист болхар санҗала, болв эн көгшн элнцг ээҗән хәләһәд, дөң күргдг бәәсн төләдән эрүл-менд харлһна көдләчин эрдм шүүҗ авсмн.

Эднә өрк-бүл Сарпан района Уманцево селәнд билә. Зе күүкнәннь болн зеенчнриннь сән хәләврт элнцг ээҗнь Цаган Овалдыковна 104 нас наслв. Селәнә эмнлһн көдләч Дуртан Валентина өдр болһн гилтә ээҗд золһҗ ирәд, түргн дөң кергтә болхла тәрлһ кеһәд, килмҗән тусхадг бәәсмн. Инна зе күүкнь дунд сурһулян төгсәһәд, Элстин Т.Хахлынован нертә медицинск училищд орв.
- Сурһулян төгсәнә дару би төрскн Уманцево селәнд ирәд, бәәрн эмнлһнд күч-көлснә хаалһан эклләв. Тенд җилдән көдләд, хөөннь Москвад одад, тенд хотл балһсна эмнлһнд цөөкн сардан бас дамшлт хоршавув. 2009 җилин эклцәр Элстин медәтнрин болн гемтә-шалтгта улсин гер-интернатд ирҗ көдлләв. Көдлмш амр биш, болв тер бийнь мана хәләврт бәәдг медәтнрт болн эрмдгтә улст килмҗән тусхаҗ, кергән үнн кевәр күцәхәр шуннав. Бичкнәсн авн талдан эрдмин тускар ухалҗ йовсн бийнь эрүл-менд харлһна көдләч болсндан төрүц һундхшв, - гиҗ Инна Алексеевна келнә.
Эндр медәтнрин болн гемтә-шалтгта гер-интернатд 165 күн бәәнә, теднәснь 108-нь эрмдгтә, тегәд эднд онц килмҗ болн сән хәләвр кергтә болна. Социальн бүрдәцин эмчнр эднә эрүл-мендин бәәдл шинҗлҗ, олн зүсн гем гетлһнә керг-үүлдврмүд давулна. Энд җил болһн диспансеризац болн хальдврта гемәс саглуллһна тәрлһн кегднә, медәтнрт гүн шинҗллт кергтә болхла таңһчин эмнлһнд күргнә. Энд һучн-дөчн җилдән көдлҗәдг медицинск эгчнр Улана Ирина, Кована Маргарита, Манҗин Мария баһчудт үлгүр-үзмҗ болҗ, байн дамшлтарн хувалцна. Овадыка Иннан келсәр, социальн бүрдәцд ирсн цагт Нина Егоровна Ерпылева болн Ирина Улюмджиевна Уланова энүнд медсән зааһад, эрмдгтә болн медәтә улсиг асрлһна туст сүв-селвгән өгч, дөң болсмн. Инна Алексеевна ах үүрмүдин күргсн ач-тусиг кезә чигн мартхш, даңгин ханлтта бәәнә.
- Бидн хоорндан ниитә бәәҗ, нег-негән дөңнҗ, арһ-чидлән негдүлҗ көдлнәвидн. Медәтә болн гемтә-шалтгта улс йирин эврә авцта, заңта болна, тегәд эднд килмҗән тусхаҗ, тесвртә болх кергтә. Шаңһа бүрдәцд бәәдг улст нег үлү онц оньг болн килмҗ кергтә болна. Олн җилдән энд бәәдг медәтнр мадна төлә өөрхн улс болв, амрлһна хөөн ирхлә, медәтнр шүлгүдән умшҗ, дууһан дуулҗ тосна. Коронавирусн гем учрсн цагт бидн селгәһәр көдлдг биләвидн, тер амр биш кемд медәтнрән нег үлү сәәнәр хәләдг биләвидн, - гиҗ Инна Алексеевна келнә.
Бичкндән элнцг ээҗән хәләһәд, тәрлһ кедгиг дассн төләдән эрүл-менд харлһна көдләч болсн Овадыка Инна хөрн шаху җилдән тааста эрдмәрн үнн-чик седклтәһәр көдлҗ йовна. Көдлмшиннь хөөн күүкд күн герүрн адһҗ, сенр хот-хол белдҗ, үүл бәрҗ цаган тустаһар давулна. Альмана күүкнь болн Давид көвүнь сурһулян сәәнәр сурч, өлзәтә сән үрд болҗ өсчәнә. Күүкнь өсхләрн шүднә эмч болхар зуралҗана. Инна Алексеевна гер-интернатд болдг олн зүсн марһаст, билг-эрдмин керг-үүлдврмүдт шунмһаһар орлцна. Эн хамдан көдлҗәдг үүрмүд дунд тоомср олҗ, шулун-шудрмг, седвәртә, өр-өвч седклтә күн болҗ тоолгдна. Эн җил социальн көдләчин сән өдрлә Овадыка Иннаг Хальмг Таңһчин залврин Күндллһнә һашгар ачлсн билә.

ДООҖАН Наталья