Түүмр шатсн кемд...

Эн зунар һаң халун нег өдр төгсч йовла. Лагань балһсна Садовая уульнцд бәәдг Йиснә Алдр үүртән золһхар шиидв. Терүнә гер тал өөрдҗ йовад, эн хам-хоша бәәдг герин һаза түүмр учрсиг үзәд, медәтә күн дөң сурҗ хәәкрҗәхиг соңсв. Алдр дарунь түүмр унтралһна цергллтд җиңнүлв. Бийнь герин һаза усна турва бәәхиг үзәд, шачах тосхлтд ус асхв. Модар кесн хаац дарунь шатад, һал герт орх әәмшг билә, дәкәд салькн көдлв.
Түүмр унтралһна цергллтин көдләчнр иртл көвүн бий деерән ус асхад, хувцан норһад, медәтә күүкд күүнд нөкд болхар адһв. Медәтиг әәмшг уга һазрт һарһҗ авсн кемд түүмр унтралһна болн түргн дөң күрглһнә цергллтс ирв. Алдр тер цагт бийиннь тускар ухалсн уга, медәтә улсин әм аврх, түүмр унтрах кергтә бәәсмн. Хөөннь эн района эмнлһнд тусв.
- Түргн дөң күрглһнә цергллтин көдләчнр ирәд, түүмрин утан нанд харшлсиг илдкв. Маңһдуртнь эмнлһнәс һарад, түүмр учрсн медәтнрт золһҗ одлав. Медәтнр нанд ханлтын үг келәд байрлв. Мини ормд кен чигн тиим шиидвр авх билә гиҗ санҗанав. Өөрән бәәсн улст дөң күргх кергтә гиҗ намаг бичкнәсм авн сурһла, – гиҗ Алдр келнә.
Келхд, Йиснә Алдр 5-ч класст сурчасн цагтан чигн түүмрәс әмтиг харсч авсн бәәҗ. Алдр бичкнәсн авн хирург болх саната бәәсмн, ода эн Т.Хахлынован нертә эмнлһнә колледжд сурчана. Сурһулян төгсәснә хөөн эн ик сурһульд орад, эмч болх күслтә бәәнә.
Әрәсән мөшклһнә комитетин Хальмг Таңһчд үүлддг мөшклһнә заллт Йиснә Алдр залу-зөрмг йовдл һарһсна тускар медәд, энүг «Халун зүркн» гидг мөрәһәр ачлх седвәр татв. Социальн-сойлын седвәрин саң эн мөрәг 2013 җилд үүдәсмн. Әрәсән гегән-герлин, сурһуль-эрдмин, харслтын, дотр-дундын министерствс, Әрәсән мөшклһнә комитет, МЧС, РФ-н Президентин медлд күүнә болн бичкдүдин зөв харсдг элчнр болн нань чигн бүрдәцс эн саңла хамдан зөрмг бичкдүдиг болн баһчудыг йилһҗ авад, шишлң темдг бәрүлҗ өгнә. Әрәсән мөшклһнә комитетин Хальмг Таңһчд үүлддг мөшклһнә заллтын барин цергллтин һардач Элдән Тамаран келсәр, эдн урднь эрмдгтә Абушан Дантесиг болн Текән Айсаг эн темдгәр ачллһна седвәр татсн билә. «Дантес бичкнәсн авн гемтә-шалтгта болв чигн спортар соньмсад, Әрәсән болн нарт-делкән марһаст ик күцәмҗ бәрҗ, билг-эрдмән делгрүлҗ нер һарна. Айса болхла дунд сурһулян йилһән сәәнәр төгсәһәд, Хальмг ик сурһульд тааста эрдм дасв. Эн «Җивр» гидг социальн төсвд орлцад, эврән бичсн шүлгт көгҗм орулв. «Невская краса» гидг марһанд 2-ч орм эзлсмн. Эн баһчуд күнд җирһлин таалд туссн бийнь олн дунд күцәмҗтәһәр үүлдҗ, билг-эрдмән үзүлҗ бахмҗ үүдәнә. Эн җил бидн Йиснә Алдр зөрмг йовдл һарһад, медәтнрин әм аврсиг медәд, «Халун зүркн» гидг олна седвәрин марһанд эрлһ орулвидн. Терүнд диилвр бәрсн улст 2026 җилд ачлвр бәрүлҗ өггдх. Йиснә Алдр дииләчнрин тоод орх гиҗ бидн ицҗәнәвидн», – гиҗ Элдән Тамара келв.

БАТАН Наталья