Өвкнриннь авъяс хадһлдг Талтаевихн

Шидр Москва балһснд «Әрәсә» гидг Келн-улсин төвд «Җилин сән гисн өрк-бүл» марһанд диилвр бәрсн өрк-бүлмүдт ачлвр бәрүлҗ өглһнә байрин керг-үүлдвр болв. Әрәсән залврин Ахлачин дарук Татьяна Голикова, Әрәсән күч-көлснә болн социальн харслтын министр Антон Котяков диилвр бәрсн өрк-бүлмүдиг йөрәһәд, ачлвр бәрүлҗ өгв. Хальмг Таңһчас эн җил Көтчнрә района Көтчнр селәнд бәәдг өнр-өсклң Талтаевихнә өрк-бүл орн-нутгин марһанд диилвр бәрәд, байрин керг-үүлдврт орлцв. Эдн «Өвкнриннь авъяс хадһлдг өрк-бүл» гидг марһанд ончрад, Күндллһнә һашгар ачлгдв.

- Бидн хулһн сарин 13-ас авн 16 күртл Москва балһснд бәәһәд, марһанд диилвр бәрсн өрк-бүлмүдлә хамдан кесг соньн керг-үүлдврт орлцвидн. Марһана бүрдәһәчнр өрк-бүл болһниг тосад, «Президент отель» гиичлүрт бәәлһәд, Москва балһсар экскурсь бүрдәһәд, күн болһнд онц килмҗ тусхав. Түрүн өдрин асхар мана ик орн-нутгин булң болһнас ирсн өрк-бүлмүд хоорндан таньлдад, сергмҗтә харһлтд орлцҗ, билг-эрдмән үзүлҗ, цаган соньнар давулв. Бидн Бурять, Хакась, Крым, Осеть, Карачаево-Черкессь Республикүдәс, Рязанск, Шартун мүҗсәс, Сарпулин крайяс ирсн өрк-бүлмүдлә таньлдвидн. Мана отхн Талта көвүн бийләһән цацу бичкдүдлә таньлдад, ода күртл хоорндан зәңгәрн хувалцҗана. Өрк-бүл болһна арвн күүнд үрвр кеҗ, хургт орлцх зөв өгв, тегәд Москвад бәәдг мана элгн-садн бас эн хургт орлцад, маднла хамдан байр хувалцв. Әрәсән регион болһнас өнр-өсклң, олн җилдән хамдан бәәдг, баһ наста, селән һазрт бәәдг, эк-эцкнь Төрскән харсчадг өрк-бүлмүд эн байрт цуглрснь бахмҗта йовдл болв, – гиҗ олн үртә Талтан Надежда келнә.
Баатр Георгиевич болн Надежда Сергеевна хөрн һар җил хооран ханьцад, зурһан үртә эк-эцк болв. Герин эзн олн җилдән түүмр унтралһна цергллтд көдлҗ йовсмн, эндр эн крестьянск-фермерск эдл-аху толһална. Авальнь Көтчнрә района түүмр унтралһна цергллтин әңгд диспетчерәр көдлҗәнә. Эн района күүкд улсин хүүвин гешүн болад, олна бәәдл-җирһлд шунмһаһар орлцна. 2018 җилд Хальмг Таңһчин Толһачин зәрлгәс иштә Талтаевихн «Күүкдтән чик сурһмҗ өгсн төлә» гидг темдгәр ачлгдсмн. Күүкднь сурһулян сәәнәр сурна, спортар соньмсна, ду-биид дурта. Ууһн Намҗл эмчин эрдм шүүҗ авв, ода эн Москвад ординатурт сурчана, Мираида РИНХ-иг йилһән сәәнәр төгсәһәд, Ростов-на-Дону балһснд көдлҗәнә, Баира эн җил дунд сурһулян төгсәһәд, оютн болв, Арслң болн Виктория Көтчнрә гимназин сурһульчнр, отхн Талта болхла «Сайгачонок» бичкдүдин садт орна.
- «Җилин сән гисн өрк-бүл» гидг марһан эн җил арвдад давулгдв, терүнд Әрәсән регион болһнас 90 шаху өрк орлцв. Диилвр бәрсн өрк-бүлмүдин төлә кесг керг-үүлдвр бүрдәгдв, бидн хоорндан таньлдад, үр-иньгүд болвидн. Күүкд өсәд-босад, талдан балһсдт сурад, көдлҗәнә, тегәд бидн хамдан иигәд хая нег цуглрнавидн. Москвад цуһар харһад, өрк-бүләрн хамдан цөөкн өдр сергмҗтәһәр давулснд бидн ик байрта бәәнәвидн. Эн марһан мана өрк-бүлиг улм хамцулҗ, нег-негндән килмҗән тусхаҗ, хамдан ямр нег төр хаһлхд туслв. Эн диилвр маднд ик омг өгв, мана бичкдүд Әрәсән хотл балһс үзв, соньн экскурсьт болн керг-үүлдврмүдт орлцв. «Өвкнриннь авъяс хадһлдг өрк-бүл» гидг марһанд диилвр бәрсн өрк-бүлмүдиг байрин хургин эклцәр Әрәсән күч-көлснә болн социальн харслтын министр Антон Котяков йөрәҗ, ачлвр бәрүлҗ өгв. Дәкәд мана өрк-бүл тәәз деер һарч ирхд мана уңг-тохмин тускар келәд, Талтан Маңка 1812 җилин Төрскән харсгч дәәнд залу-зөрмгән үзүлсн төләдән әрүн Аннан 3-ч девсңгин орденәр ачлгдсна, Надмид Санджиевич Талтаев болхла 1942 җилд Сталинградск бәрлдәнд орлцсна тускар келснь бахмҗта болв. Төрскән харсачин җилд орн-нутгин хотл балһснд мана өвкнрин нерн һарснь мартгдшго ончта йовдл болв, – гиҗ Баатр Георгиевич темдглв.
Байрин хургт Әрәсән нертә артистнр Стас Пьеха, Илона Броневицкая, Александр Маршал, Лев Лещенко, Татьяна Куртукова, Валерия, Хабиб орлцад, өрк-бүлмүдиг йөрәв. Өрк-бүлмүд келн-улсин хувцтаһан зурган цокулв. Хөөннь эднә зургуд «Туурмҗин дегтр» гидг шишлң һарцд олзлгдҗ барлгдхмн, өрк-бүл болһнд терүг белглхмн.
ДООҖАН Наталья
ЗУРГТ: Әрәсән күч-көлснә болн социальн харслтын министр
Антон Котяков Талтаевихнә өрк-бүлиг йөрәҗәнә