Өрк-бүлмүд марһлдхмн

Әрәсән Президент Владимир Путинә седвәрәр 2018 җилд бүрдәгдсн «Әрәсә – эв-арһин орн-нутг» гидг бүрдәц күн болһнд билг-эрдмән үзүлҗ, бийиннь тускар олнд медүлх арһ өгнә. Терүнд ик-бичкн уга дамшлтарн хувалцҗ, седвәрән татҗ, олн зүсн керг күцәҗ чадна. Давсн җиләс авн бүрдәцин медлд «Энтн мана өрк-бүлин авъяс» гидг Әрәсән марһан давулгдҗана. Нидн болсн марһанд ут тоодан 102735 баг орлцсн билә, теднәснь 300 өрк-бүл ашлгч девсңд һарв, 32 өрк дииләч болв. Келхд, марһанд диилвр бәрсн өрк-бүлмүдт гер-бүүрин таал ясруллһнд 5 сай арслңга мөрә бәрүлҗ өггднә, эднд орн-нутгар зуульчлх арһ өггднә. Хальмг Таңһчас нидн Корниенкон өрк-бүл Владивостокд күрәд ирсн билә.

Эн җил «Энтн мана өрк-бүлин авъяс» гидг марһана ашлгч девсңд 1523 өрк-бүлин баг һарв. Хальмг Таңһчас терүнд хойр өрк-бүл орлцхмн, эннь Элст балһснд бәәдг Корниенкон өрк-бүл болн өнр-өсклң Боктаевихн Цаһан Амнас мөн.
Әрәсән Президентин һардврин ахлачин негдгч дарук, «Энтн мана өрк-бүлин авъяс» гидг марһана зүүцүлгч хүүвин ахлач Сергей Кириенкон темдглсәр, нидн 587 миңһн күн марһанд орлцх эрлһән орулсн болхла, эн җил 726 миңһн күн ирлцңгү седвәр татв. Эн җил марһанд орлцачнр дунд соньн өрк-бүлмүд бәәнә. Тиигәд, Тамбовск мүҗин Крутые Выселки селәнд бәәдг Болдыревихнә, Долговихнә, Кочуковихнә, Мантулинихнә өрк-бүлмүдин багин ханьд 30 күн орна, Забайкалын Целинное селәнә Ольховскийхнә өрк-бүлд 28 үрн бәәнә, теднәснь 25-нь көвүчлҗ авсмн. Нидн хамгин медәтә орлцачнь йиртә бәәсмн, эн җил Нижний Тагилас орлцҗадг багин ханьд 100 наста медәт бәәхнь бахмҗта. Марһанд орлцачнрин темдглсәр, эдн хамдан цаган сергмҗтәһәр давулҗ, билг-эрдмән үзүлҗ чадна гиҗ Сергей Кириенко келв.
«Әрәсә – эв-арһин орн-нутг» гидг бүрдәцин һардач Андрей Бетинә келсәр, марһана девсң дөрвн сардан болв, терүнә йовудт өрк-бүлмүдин багмуд олн зүсн халхар 48 даалһвр күцәв. Эдн үүдәгч, билг-эрдмин, спортын, көгҗмин, утх-зокъялын болн нань чигн даалһвр күцәҗ, өрк-бүлиннь тууҗин, авъясмудын, авг-бәрцин, тааста кергүдин тускар медүлв. Алдр Диилврин 80 җилин өөнд нерәдҗ Төрскән харсгч Алдр дәәнә төрәр даалһврмуд бас өггдсн билә.
БАТАН Сәәхлә