Нөкцлтин бооцан батлгдв

Мана таңһчд Энткгин делегацин йосна гиичллһнә йовудт олн керг-үүлдвр болн харһлтс болв. Одахн Б.Б.Городовиковин нертә Хальмг ик сурһульд күндтә гиичнр ирәд, Энткг орн-нутгин Наланда ик сурһульла нөкцлтин бооцан батлгдв.

Әрәсәд Энткгин элчллтин министр Нихилеш Чандра Гири, сурһуль-эрдмин министр Винай Кумар, Наландан ик сурһулин элч Сачин Чатурведи, Хальмгин залврин Ахлачин дарук – то-дигин делгрлтин министр Этән Алексей, Хальмг ик сурһулин һардач Салан Бадм эн керг-үүлдврт орлцв.
Салан Бадм күндтә гиичнриг тосад, эн бооцан сурһуль-эрдмин, номин болн сойлын халхсар мана орн-нутгудын хоорндк хәрлцәнә делгрүллһнд туслхинь темдглв. Тер мет Бурхн Багшин әрүн тоот хальмг һазрт авч ирснь бас тууҗлгч йовдл болсиг онц заав. Дарунь Бадм Катинович Хальмгин ик сурһулин тускар гиичнрт тодрхаһар келҗ өгв. – Эндр Хальмг ик сурһуль делкән 23 орн-нутгин вузмудла нөкцлтҗәнә. Терүнәс нань мана таңһчд 53 орн-нутгас 1500 шаху оютн сурна. Тер тоод Энткгәс 50 көвүн-күүкн бас ирв, – гиҗ Бадм Катинович келв.
Наланда ик сурһулин элч Сачин Чатурведи эднә бүрдәц кезәнә бүрдәд, эндр күртл орн-нутгиннь номин болн сойлын делгрлтд тәвцән орулҗ йовхиг темдглв.
Нөкцлтин бооца күцәлһнә йовудт өөрхн җилмүдт мана багшнр тиигәрән одад, шар шаҗна болн дорд үзгин шинҗллтин төрмүдәр дамшлт хоршах болв. Тер мет хамцу соньн төсвс күцәхин тускар күүндвр бас һарв. Тер тоод хату цаас авлһна, сойлын наадм давуллһна болн кесг талдан соньн көдлмш кехәр үгцсн билә. Харһлтын ашар Әрәсән болн Энткгин хоорндк нөкцлт хойр орн-нутгт туста болхмн, гиҗ келгдв.
ОЛЬДАН Цаһан