Лаганьд шүлгләнә байр болв

Хальмг улсин шүлгч Увшан Явана шүлгүд соңсхар кесг күн цуглрҗ ирв. «Алтн цаг» нертә төвд ах үйин әмтн цуглрҗ күүндәд, амрлһна цаган давулна. Эн өдр болхла, балһсна әмтн нег һазра шүлгч бичсн шин шүлгүдиг соңсв.

Җирһлднь учрсн олн зүсн йовдлмудыг тодлад, Увшан Яван ода бичгдсн шүлгүдәсн умшад, ирсн улсиг соньмсулв. Тууль-түүкд сүл цагт оньган өгсән, әмтнә хурц үгмүд гүн чинртәһинь зааһад, бичснәсн кесгинь түрүләд хальмг келәр умшҗ өгәд, дарунь орс келнд орчулсан әмтнд соңсхв.
Урн үгин эн харһлтын йовудт әмтн дегтрин һәәхүллә таньлдв. Увшан Явана үүлдврт олн-зүсн төрәр, кесг янзар бичгдсн дегтрмүд бәәхинь умшачнр медҗ авв. Төрскн келндән хару, эврә һазртан цань уга дурта билгт эдн дунд бәәхәрнь бахмҗта болна. Харһлт болһнд билгтә эн күн шин үүдәврмүдән умшна. «Үгмүд дотрасм бульглад һарад бәәнә, - гиҗ Увшан Яван инәҗ келнә. - Зәрмдән бичгдх тоот зүүдндм орна. Цуг тер олн дүрмүд болн төрмүдиг цааснд буулһҗ, янзлулҗ, олн-әмтндән күргҗ медүлхәр бәәнәв».
Эгчдән нерәдәд бичсн дууһан чигн Увшан Яван дуулҗ өгв. Нина Бемдаевнан һарсн өдртнь нерәдсн «Эгчин дун» цугтад таасгдв. Билгтә эн күн үүдәсн олн дууһинь ода кен эс меднә? «Цецгәрич, Хальмг минь» гидг һанцхн дунь Хальмгин тууҗд орхмн.
Хальмг улсин урн үгин ик зөөр болҗадг «72 худлыг» Увшан Яван умшад, цугтад сергмҗ үүдәв. «Стань звездой» болн «Сиврин белг» гидг шүлгүдинь әмтн оньган өгч соңсв.
Хальмг улсин шүлгч Увшан Яванла болсн харһлт үр-иньгин бәәдлд давв. Әмтн дурта дууһан дуулад, хальмг шүлгүд умшад сергмҗтәһәр амрв.

УШКАНА Сувсн