Иньгллтин концертд

Элстд хулһн сарин 23-д хамцу концерт болв. Хальмг филармоньд Хальмгин Келн-улсин оркестр болн Людмила Зыкинан нертә «Россия» гидг орс дууна академическ ансамбль билг-эрдмән үзүлв.

Көгҗмин халхар йир соньн концерт элстихнә болн хотл балһсна гиичнрин оньгиг авлв. Келн-улсин оркестр дарани шин кемән эн хамцу көгҗмин үүлдврәр эклҗәхнь йир сән йовдл мөн.
Келн-улсин зевсгүд татдг көгҗмчнриг белдлһнд, теднә мергҗлтинь өөдлүллһнд, хальмг көгҗмчнрин үүдәврмүдиг тархалһнд Келн-улсин оркестр ик көдлмш кеҗ йовна. Оркестрин ханьд үүлдҗәдг нертә олн дуучнр хальмг дууна эрдмиг делгрүлҗәнә. Җил болһн эдн шин үүдәврмүдәр соңсачнран байрлулна. Эн җилд чигн оркестр кесг керг-үүлдврт орлцҗ, таңһчин билг-эрдмиг талдан регионмудт күргҗ үзүлв. Оркестрин артистнр болн көгҗмчнр таңһчин сойлын хамцу концертст даңгин орлцна.
Концертд ирсн әмтн Келн-улсин оркестрин художественн һардач, Хальмг Таңһчин билг-эрдмин ачта үүлдәч Катан Саврин «Бумбин орн» гидг көгҗмин нааднла таньлдв.
Даруһас Людмила Зыкинан нертә «Россия» орс академическ коллектив тәәз деер һарч ирҗ, орс үүдәврмүдиг әмтнә оньгт тусхав.
Делкәд нер һарсн коллективин тускар цөн үг бичх седкл бәәнә. Нер һарсн дууч Людмила Зыкина энүг 1977 җилд бүрдәсмн. Ансамбль бүрдәхд нертә болн тоомсрта продюсер Соломон Юрок дөң болсмн. Түрүләд США-н дөчн балһсиг эргҗ йовад, Нью-Йоркд билгән үзүлсн болдг.
Ансамблин үүлдврнь йир соньн. Москван болн Санкт-Петербургин хамгин сән тәәз деер үүлдәчнр билгән үзүлнә. Әрәсән болн делкән кесг балһсдар гастрольд йовна.
ҖИРҺЛИН Кермн