Башкир күүкнә санлынь мөңкрүләд

Шидр таңһчин Улсин Хуралд (Парламентд) Хальмгин Толһачин элч Манҗин Араш Сарпан района муниципальн бүрдәцин толһач Манҗин Басңла хамдан Башкортостан Республикд йовад, Төрскән харсгч Алдр дәәнә цагт хальмг һазрт туурмҗарн ончрсн башкир күүкд күн Зайтуна Альбаевад нерәдсн санлын керг-үүлдврт орлцв.

Баатр күүкнә өсч-боссн Киргиз-Мияки селәнд ирлцңгү керг-үүлдврмүд болв. Терүнә йовудт района дунд сурһульд энүнд нерәдсн «Баатрин ширә» секгдв, сойлын Герт болхла Зайтуна Альбаеван җирһлин хаалһин туск һәәхүл бүрдәгдсн билә. Тер мет Башкортостана Салаватск шаңһа драмин театр «Зайтуна» нертә наадан үзүлв. Керг-үүлдврмүдин чилгчәр баатр күүкнә өөрхн элгн-саднднь Башкортостана Республикин болн Хальмг Таңһчин шаңһа ачлврмуд бәрүлҗ өггдв. Башкортостан Республикин Миякинск района болн Хальмгин Сарпан района хоорнд батлгдсн бооцана йовудт эн керг-үүлдврмүд давулгдсмн.
Тодлхд, Сарпан района һазрт Төрскән харсгч Алдр дәәнә цагт Зайтуна Альбаева баатр йовдл һарһад, әмнәсн хаһцад, эн җилин ноха сарин 9-д дигтә 83 җил болв. Эн зунар Башкортостана театрин артистнр Садовое селәнд ирәд, зөргтә күүкнә тускар наадан үзүлсн билә. Терүнә дару Зайтуна Альбаева оршагдсн үкәрт гүрмр цецгүд тәвгдв. Башкир күүкнә баатр йовдл Башкортостана болн Хальмг Таңһчин бәәтхә цуг Әрәсән тууҗд орснь лавта. Төрскән харсачин җиллә болн Алдр Диилврин 80 җилин өөнлә ирлцсн эн керг-үүлдврмүд темдгтә болв гиҗ онц заах кергтә.
КАРСАНА Евгения