Һазрин холыг өөрдхәд…

Эн өдрмүдт мана таңһчур хол Китдин Шинҗәнә һазрт бәәдг «тасрсн махн, өсрсн цусн» ахнр-дүүнр зуульчлҗ ирв. Өвкнриннь һазрт түрүн болҗ ирсндән, Иҗл һолд күрәд, аав-ээҗнриннь әрүн санан-седкл күцәсн күндтә гиичнр билг-эрдмән үзүлҗ, иньгллтин концертд орлцв. Төрскн һазрасн кесг зун җил хооран салсн бийнь эдн хальмг келән, сойлан, авг-бәрцән хадһлад, дорас өсч йовх баһ үйд дасхч йовхнь темдгтә. Ик холас ирсн гиичнрин концерт хәләхәр олн улс ирв.

Хальмг Таңһчин Улсин Хуралын (Парламентин) депутатнр Цевгә Григорий болн Мацга Татьяна күндтә гиичнрт цуг хальмг улсин нерн деерәс халун менд күргҗ, эн зуульчллһ бүрдәсн баахн Туңглг күүкнд зака үүдәгч бүрдәцин Күндллһнә һашг бәрүлҗ өгв. Гиичнр болхла Манҗин Аркадин нертә шаңһа филармоньд бас белгән нерәдәд, терүг сойлын бүрдәцин һардачд, Хальмг Таңһчин ачта артистк Очкан Аннад бәрүлв. Өөрдин хуучн авъясар концерт ут дууһар эклв.
«Җаңһр» гидг зуульчллһна төвин һардач Туңглг мана тал эн зунар түрүн болҗ әмтиг авч ирсмн. Зунар ирсн багд 130 күн билә, ода 23 күн ирв. Цуһар эдн нурһлҗ медәтә улс болна, эдн насн-җирһлиннь туршарт олн эрдмәр көдлҗ йовсмн, ода ачта амрлһнд бәәнә. Тиигәд, Шинҗәнә улсин дууч, Моңһл орн-нутгт ут дууна марһанд алтн медаль шүүҗ авсн Бадма эгч дөчн һар җилдән эмчәр көдлҗ йовсмн. Эн ээҗәсн ут ду дасч авсмн, тернь Иҗл һолын, өнчн темәч көвүнә туск хуучн цага дуд дуулдг бәәҗ. Арвн тавн җил хооран Бадма үүдәгч баг бүрдәһәд, ода дунд болн ик сурһульмудт баһ үйд ут ду дасхчана. Далн йистә Һару ээҗ өөрд моңһлчудын «сәврдң» би бииләд, олн әмтнә седкл авлв. Ээҗ 3 миңһн сурһульчд бииһин эрдм зааҗ өгсмн. Найн зурһата Бапа ээҗ болхла хуучн товшур цокад, цуглрсн улсин чикнә хуҗр хаңһав. Эн җил мана алдр «Җаңһр» дуулврин 585 җилин өөн болҗана, тегәд Шинҗәнәс ирсн гиичнр терүг хәәләд, бас билг-эрдмәрн бахмҗ үүдәв. Эдниг дахад нертә дууч Шаран Дима Ээлән Овлаһас болн Шавалин Даваһас бичҗ авсн «Җаңһр» дуулврин тасрхас хәәлснь бас соньн болв.
Келхд, эн концертд Хальмгин билгтнр бас орлцснь харһлтыг кеерүлв. Тиигәд, нертә артистнр Мукөвүнә Кутлан, Шаран Дима, Манҗин Эмбан нертә «Герл» бичкдүдин бииһин ансамбль билг-эрдмән үзүлҗ, ах-дүүнрин концертин кеермҗ болв. Арвн негн җил хооран нааран нүүҗ ирәд, энд өркән өндәлһсн Нимгрин Байрт «Төрлмүд мини» ду дуулхла, цуһар дахад дуулв. Хол һазрас ирсн аав-ээҗнр цуһар тәәз деер һарч, сәврдң биилв. Эдн дәкәд хавртан ирхәр зуралҗахан келв. «Хаалһин холас әәлго, аавнр-ээҗнриннь күсл күцәһәд бидн тана тал ирсндән байрта бәәнәвидн. Бидн нег яста, нег тууҗта, нег махн, нег цусн ахнр-дүүнр болнавидн. Тадн мадниг халунар тоснат, тадниг бидн бас күләҗәнәвидн», - гиҗ күндтә гиичнр темдглв.
ДООҖАН Наталья