Нег һазра улсан темдглв

Одахн Москвад Хальмг Таңһчин элчллтд соньн харһлт болв. Орн-нутгин хотл балһснд бәәдг төрскнч болн буйнч седклтә нег һазра зурһан күн «II девсңгин фронтд дөң-тусан күргсн төлә» медальмүдәр ачлгдсн болдг. Тедн дунд Эвин Нүүдлә, Даван Сяахә, Манҗин Максим, Мудан Надежда, Бадминә Елена болн Зоя Зубкова заагдв.

Цергә шишлң керг-үүлдврин ветеран, Элст балһсна Хургин депутат Чумуда Николай керг-үүлдврт орлцад, нег һазра улсан темдгләд, медальмүд өрчднь зүүв.
– Эн цаһан седклтә улс эмнлһнд бәәдг нег һазра цергчнрт даңгин золһад одна. Тер мет буйнч седклин дөң цуглулад, СВО давҗадг һазрур илгәнә, – гиҗ Николай Санджи-Горяевич темдглв.
Харһлтын йовудт Чумуда Николай теднлә өөрхн таньлдҗ, күн болһниг соңсад, цааранднь чигн олна кергин төлә хамцад, альд йовв чигн, төрскн нутган мартлго, нег һазра улсан дөңнәд бәәх кергтә, гиҗ харһлтд орлцачнр ашлв. Керг-үүлдвриг бүрдәсн Хальмгин залврин Ахлачин дарукин үүл дааҗадг – Москвад Әрәсән Президентин медлд бәәдг Хальмг Таңһчин элч Мучкинә Гернзлд ханлтан эн өргв.
БАДМИН Занда