Медаляр ачлгдв

Одахн Сарпуль балһснд «Мал өсклһнд шин эв-арһс олзллһн. Орн-нутгт хот-хоолын әәмшг уга бәәдл тогталһн» нертә нарт-делкән хург болв. Әрәсән регионмудын болн Узбекистана селәнә эдл-ахун бүрдәцсин һардачнр, номтнр, йосна элчнр, мана таңһчин элчнр хургт бас орлцсн болдг. Онц темдглхд, Хар Һазра района толһач, Хальмг Таңһчин Баатр Болдра Валерий «Хө өсклһнә халхар ачта көдләч» нертә медаляр ачлгдв. Валерий Астаевич «Первомайский» СПК-н үлгүрәр хө өсклһнә болн торһн ноос кеҗ һарһлһна төрмүдәр илдкл кев. Тер мет хургин йовудт селәнә эдл-ахун халх цааранднь делгрүллһнә туск чинртә төрмүд босхгдв, хөд өсклһнд болхла онц оньг тусхагдв. Ачлвр зүүсн Болдра Валерий ханлтан өргәд, эн хамдан көдлҗәдг олн улсин нилч болҗана, гиҗ медүлв.
– Болдра Валерийиг мана таңһчд меддго күн уга, гиҗ келх кергтә. Таңһчин селәнә эдл-ахун, нег үлү мал өсклһнә халхд эн ик тәвцән орулҗадг күн болна. Олн җилдән мал өскдг нүүрлгч эдл-ахусин тоод һардҗадг энүнә бүрдәц орна. Терүнәс нань орн-нутгт АПК-н халхар бүрдәгддг һәәхүлмүдт болн ирлцңгү керг-үүлдврмүдин шунмһа орлцач болна. Валерий Астаевичиг йөрәһәд, кергән цаарандан делгрүләд йовхд цаһан хаалһ дурдҗанав, – гиҗ таңһчин селәнә эдл-ахун министр Гаван Тимур темдглсн болдг.

КАРСАНА Евгения