Үүрмүдин харһлтс сергмҗтә болна

Җил болһн хулһн сарин 15-д нүднә харань муурсн улсин төрмүдт оньг тусхахин төлә нарт-делкәд «Цаһан тайгин өдр» болна. Үкр сарин 13-д болхла нүднә харань муурсн улсин Өдр темдглнә. Эн җил нүднә харань муурсн улсин Әрәсән олна ниицәнә (ВОС) Хальмг Таңһчд үүлддг әңгин шиидврәр эн хойр өдриг хамцулад, сара хонга керг-үүлдврмүд зарлгдв.

Мана таңһчд үүлддг региональн әңгин ахлачин нөкд Оруса Лидиян келсәр, эднә олна бүрдәцин гешүдин төлә олн зүсн керг-үүлдвр бүрдәгдв. Одахн гилтә мана таңһчур Бурхн Багшин әрүн тоот авч ирсн билә, тегәд нүднә харань муурсн улсин төлә «Бурхн Багшин Алтн Сүм» Хальмгин төв хурлд экскурсь болв. Ут тоодан 40 күн Төв хурлд одад, әрүн санаһан күцәв. Эврә сән дурар үүлддг улс гемтә-шалтгта улст дөң-тусан күргҗ мөргәд әдс авхд нөкд болв. Нүднә харань муурсн улст килмҗән тусхаһад, сән таал тогтаҗ дөң болснь эднд ик байр үүдәв.
Шаҗна нарт-делкән ик хургт белдвр кеҗ мана хотл балһснд аһу ик көдлмш кегдв, шин хаалһс тосхгдв, бумблвс босхгдв, паркст сән кец-таал тогтагдв. Тегәд хурлд одсна хөөн олна ниицәнә гешүд Элст балһс һәәхәд, соньн экскурсьт орлцв. Эдн Хальмгин Баатр, нертә көгҗмч болн дууч Манҗин Аркадин нертә талвңд, алдр шүлгч Александр Пушкинә скверт босхгдсн бумблвсин өөр амрв. Хамдан давулсн цаг эднд уудьвран һарһҗ, кесгәс нааран үзәд уга үүрмүдтәһән харһхд туслв. Давсн амрлһна өдрмүдт олна ниицәнә гешүд «Кинон көгҗм» гидг концертд одад, артистнриг дахад дурта дууһан дуулад, цаган сергмҗтәһәр давулв.
- Мана таңһчд үүлддг олна ниицәнә ханьд 500 шаху гешүн орна. Райодт мана ниицәнә әңгүд үүлднә, тегәд тенд бас олн зүсн керг-үүлдврмүд бүрдәгдв. Лаганя районд нүднә харань муурсн улсин төлә харһлт болв, эднә төлә бәәрн билгтнрин концерт болв. Баһ Дөрвдә района дегтрин саңгин көдләчнр мана гешүдин төлә соньн дегтр умшч, хөөннь терүгәр күүндвр тогтав. Городовиковск районд шатрин болн дөөвин марһан болв. Гемтә-шалтгта улст, нег үлү нүднә харань муурсн улст зәрмдән гертәсн һардг арһ уга болна, тегәд иим харһлтс эднд сергмҗ, омг-чидл үүдәнә. Өр-өвч седклтә улс мана олна ниицәнд дөңгән күргҗ, ямр нег керг-үүлдвр давулхд туслна. Бидн цаһан седклтә улст ик ханлтта бәәнәвидн, -гиҗ Лидия Эренценовна келв.
ВОС-ин таңһчд үүлддг әңг үкр сарин 13 күртл дәкәд чигн соньн керг-үүлдвр давулхар зуралҗана. Сән авъяст тохрсар, нүднә харань муурсн улсин төлә харһлтс, марһас бүрдәгдхмн.
БАТАН Сәәхлә
ЗУРГТ: нүднә харань муурсн улс Бурхн Багшин Алтн сүмд одсн кем